”وہ دودھ جو بچوں کو ہم جنس پرست بنا دیتا ہے“

جکارتہ (نیوز ڈیسک) ہم جنس پرستی کی لعنت دنیا میں زمانہ قدیم سے ہی موجود ہے، اور پاﺅڈر والے دودھ کا استعمال بھی دنیا کئی دہائیوں سے کر رہی ہے، لیکن ان دونوں چیزوں کا باہمی تعلق پہلی دفعہ انڈونیشیا کے ایک سیاستدان (جی ہاں، سانئسدان نہیں بلکہ سیاستدان) نے دریافت کیا ہے۔
اخبار ”ڈیلی میل“ کے مطابق تانگ رانگ شہر کے میئر عارف وسمانیہ نے ایک تقریب میں خطاب کرتے ہوئے انکشاف کیا کہ پاﺅڈر والا دودھ پینے والے بچے بڑے ہو کر ہم جنس پرست بن جاتے ہیں۔ ان کا کہنا تھا کہ حالیہ کچھ عرصے میں ہم جنس پرستوں کی بڑھتی ہوئی تعداد کی اصل وجہ پاﺅڈر والا دودھ ہے، جبکہ نوڈلز بھی اس مسئلے کی ایک وجہ ہیں۔ انہوں نے پاﺅڈر والے دودھ اور نوڈلز کو مغرب کی سازش قرار دیا جو کہ مشرقی ممالک کے بچوں کو ہم جنس بنانے کیلئے تیار کی گئی ہے۔ انہوں نے والدین کو خبر دار کیا کہ وہ اپنے بچوں کو ان دونوں اشیاءسے محفوظ رکھیں، ورنہ اپنی اولاد کو ہم جنس پرست بنانے کے لئے وہ خود ذمہ دار ہونگے ۔
واضح رہے کہ یہ دونوں اشیاءدنیا بھر کی طرح پاکستان میں بھی بکثرت استعمال ہوتی ہیں، اور خصوصاً شہری علاقوں میں تو تقریباً ہر گھر میں یہ روز مرہ استعمال کی چیز ہیں۔