ماہر فلکیات نے عید الا ضحی 2ستمبر کو ہونے کی پیشگوئی کر دی

اسلام آباد

اسلام آباد(اے پی پی ) ذی الحج 1438ھ کا چاند دیکھنے کیلئے روئت ہلال کمیٹی کا اجلاس 22اگست 29ذیقعد کی شام طلب کر لیا گیا ۔محکمہ مذہبی امور کے ذرائع نے بتایا کہ مرکزی روئت ہلال کمیٹی کا اجلاس 29ذیقعد بمطابق 22اگست کی شام بوقت نماز مغرب کمیٹی کے مرکزی چیئر مین مفتی منیب الرحمن کی زیر صدارت محکمہ موسمیات بلڈنگ کراچی میں منعقد ہو گا جبکہ زونل روئت ہلال کمیٹیوں کے اجلاس اسی روز ان کے مقررہ مقامات پر منعقد ہوں گے جن میں چاند دیکھنے سمیت ملک بھر سے چاند کی شرعی روئت کے مطابق چاند نظر آنے یا نہ آنے کا اعلان کیا جائے گا۔

انہوں نے بتایا کہ حتمی اعلان چیئر مین مفتی منیب الرحمن میڈیا پر کریں گے۔دوسری جانب ملک کے ممتاز ماہر فلکیات ،قمر شناس، علم الاعداد، رویت ہلال ایکسپرٹ پروفیسر محمد حمزہ نعیم پرنسپل (ر) گورنمنٹ پوسٹ گریجوایٹ کالج جھنگ نے پیش گوئی کی ہے کہ اس بار ذیقعد کا مہینہ 29کی بجائے 30ایام پر مشتمل ہو گا لہٰذا ذی الحج کا چاند 23 اگست بمطابق 30ذیقعد کی شام نظر آئیگااور یکم ذی الحج 24 اگست کو ہوگی جبکہ فرزندان اسلام ہفتہ 2 ستمبر بمطابق 10 ذی الحج کو عید قربان منائیں گے۔ایک ملاقات کے دوران انہوں نے بتایا کہ نیا چاند 21 اگست کی شام پیدا ہوگا مگر 22 اگست منگل کی شام اس کا لیگ ٹائم پورا نہیں ہوگا اسلئے منگل 22 اگست کی شام مذکورہ چاند کا نظر آنا ممکن نہیں۔

انہوں نے کہا کہ 23 اگست بدھ کی شام نئے چاند کی طبعی عمر پوری ہوگی اسلئے اسے باسانی دیکھا جاسکے گا۔ انہوں نے بتایا کہ 10 ذی الحج 2 ستمبر ہفتہ کو ہوگی اسلئے ہفتہ کو ملک بھر کے فرزندان اسلام عید قربان منائیں گے۔