وزارت داخلہ کا ڈپٹی چیئرمین نیب امتیاز تاجور کے خلاف مقدمہ درج کرنے کا حکم

اسلام آباد

اسلام آباد (ڈیلی پاکستان آن لائن)وزارت داخلہ نے بدعنوانی کرنے پر ڈپٹی چیئرمین نیب امتیاز تاجور کے خلاف مقدمہ درج کرنے کا حکم دے دیا۔
نجی ٹی وی ایکسپریس نیوز کے مطابق ڈپٹی چیئرمین نیب امتیاز تاجور کے خلاف کئی ماہ سے ایف آئی اے میں انکوائری جاری تھی اور یہ انکوائری مکمل ہونے کے بعد ہی ان کے خلاف مقدمہ درج کرنے کا حکم دیا گیا ہے، ان کے خلاف یہ مقدمہ ایف آئی اے اقبال ٹاﺅن تھانے میں درج کیا جائے گا۔
امتیاز تاجور پر الزام ہے کہ انہوں نے بطور چیئرمین نادرا ہزاروں روپے کے پرفیوم خریدے جبکہ انہوں نے سرکاری خزانے سے قیمتی موبائل فون اور لیپ ٹاپ بھی خریدے۔ موصوف نے عمرہ بھی کیا اور اس کے اخراجات اپنی جیب سے ادا کرنے کی بجائے سرکاری خزانے سے ادا کیے۔ انہوں نے عمر ے کی فیس کی مد میں 79 ہزار روپے سمیت دیگر تمام اخراجات عوام کے ٹیکس کے پیسوں سے ادا کیے تھے۔