شدید بارش کے باعث جمع ہونے والے پانی میں ڈوبنے سے 5 بچے جاں بحق ،وزیر اعلیٰ پنجاب نے رپورٹ طلب کر لی

جھنگ(ڈیلی پاکستان آن لائن)شدید بارش کے باعث جمع ہونے والے پانی میں ڈوبنے سے 5 بچے جاں بحق ہو گئے،وزیراعلی پنجاب میاں شہباز شریف نے اس افسوس ناک  سانحے کی خبر ملتے ساتھ ہی انتظامیہ سے رپوٹ طلب کرلی

تفصیلات کے مطابق جھنگ کی تحصیل اٹھارہ ہزاری کے علاقے کوٹلی باقر شاہ میں بارش کے باعث جگہ جگہ پانی کھڑا ہونے سے علاقہ تالاب کا منظر پیش کرنے لگا، جس میں گرمی سے ستائے بچوں نے نہانا شروع کر دیا اور اسی دوران نہاتے ہوئے 5 بچے ڈوب کر جاں بحق ہو گئے۔ جاں بحق ہونے والوں میں 9 سالہ ثقلین، 12 سالہ مصباح، 10 سالہ ضیاء ، 9 سالہ صائمہ، 8 سالہ ثانیہ اسلم شامل ہیں۔وزیراعلی پنجاب میاں شہباز شریف نے واقعے کا نوٹس لیتے ہوئے انتظامیہ سے رپوٹ طلب کرلی ہے جبکہ معصوم بچوں کی اچانک موت پر پورا علاقے میں سوگ کی فضا قائم ہو گئی۔