14روٹس پر 200 فیڈر ایئر کنڈیشنڈ بس سروس کا باقاعدہ آغاز خوش آئند ہے،تنویر اسلم
لاہور (اپنے خبر نگار سے)صوبائی وزیر تعمیر و مواصلات ملک تنویر اسلم اعوان نے اپنے ایک بیان میں پاکستان بالخصو ص پنجاب کی عوام کو مبارکباد دیتے ہوئے کہا ہے کہ وزیراعلیٰ پنجاب شہباز شریف کے عزم کی عکاسی کرتے ہوئے پنجاب ماس ٹرانزٹ اتھارٹی کے تحت پہلے مرحلے میں 14روٹس پر 200 فیڈر ایئر کنڈیشنڈ بس سروس کا باقاعدہ آغاز ہوگیا ہے۔ہر شہری کو انٹر نیشنل معیار کی باوقارعوامی ٹرانسپورٹ کی فراہمی بلا شبہ حکومت پنجاب کی جانب سے بہترین تحفہ ثابت ہو گا ۔ صوبائی وزیر نے کہا کہ ای ٹکٹنگ کے ذریعے سستے ترین کرایہ کے ساتھ ہر 500میٹر پر بس سٹاپ قائم کیا گیاہے اور ہر 10منٹ بعد بس کی آمد ہوگی۔یہ سپیڈ بسیں ڈیوو بس سروس کے ساتھ روٹ شیئر کریں گی،یہ بسیں انٹرنیشنل معیار کی ہیں اور ای ٹکٹنگ کی سہولت کے ساتھ جی پی ایس ٹریکنگ سسٹم بھی اس میں نصب ہوگا۔صوبائی وزیر نے مزید کہا ہے کہ خادم پنجاب کی جانب سے میٹرو بس سروس پہلے ہی عوام کی سہولت کا باعث بنی ہوئی ہے اور اس کا جال اب پورے پنجاب میں پھیلایا جا رہا ہے۔پنجاب بھر میں تعمیرو مواصلات ڈیپارٹمنٹ تیزی سے عوام کی خدمت میں مصروف عمل ہے۔کسی بھی ملک کی ترقی کا راز تعلیم،ہیلتھ او ر بہترین انفرااسٹرکچر پر مشتمل ہوتا ہے۔پنجاب بھر میں سڑکوں کا جال تیزی سے بچھایا جا رہا ہے تاکہ عوام کو معیاری اور پرسکون سفر فراہم کیا جا سکے۔
