این اے 120 کا بڑا انتخابی دنگل ،مسلم لیگ ن کی بیگم کلثوم نواز نے ڈاکٹر یاسمین راشد کو شکست دے دی
لاہور(ڈیلی پاکستان آن لائن)این اے 120کے ضمنی انتخاب میں ملکی تاریخ کا بڑا انتخابی دنگل مسلم لیگ ن نے فتح کر لیا ہے ، غیر سرکاری و غیر حتمی نتائج کے مطابق مسلم لیگ ن کی امیدوار اور سابق وزیر اعظم نواز شریف کی اہلیہ بیگم کلثوم نواز نے 61254 ووٹ حاصل کر کے تحریک انصاف کی امیدوار ڈاکٹر یاسمین راشد کو 14 ہزار ایک سو 88 ووٹوں سے شکست دیتے ہوئے تاریخی انتخابی معرکہ سر کر لیا ,بیگم کلثوم نواز کی جیت کی خبر ملتے ہی مسلم لیگ نواز کے کارکنوں کی جانب سے جشن شروع ،ڈھول کی تھاپ پر بھنگڑے اور شاندار آتش بازی کا مظاہرہ اور سابق وزیر اعظم نواز شریف کے حق میں نعرے بازی کی جارہی ہے،دوسری طرف پی ٹی آئی کی امید وار ڈاکٹریاسمین راشد نے میڈیا سے گفتگو کرتے ہوئے کہا کہ ہمارے اعتراضات الیکشن کمیشن کے خلاف تھے،یہ جنگ ختم نہیں ہوئی اور جب تک الیکشن کمیشن اپنے آپ آزاد نہیں کرتا اور سب کو برابر کا کردار ادا کرنے کا موقع نہٰں دے گا ، تب تک ہم اس ادارے کے پیچھے پڑے رہیں گے، میں 29 ہزار ووٹوں کے لیے دوبارہ عدالت میں جاؤں گی،دوسری طرف اس تاریخی فتح پر سابق وزیر اعظم کی صاحبزادی مریم نواز نے کہا کہ اللہ تعالیٰ کا لاکھ لاکھ شکر ہے، آج مسلم لیگ(ن) کا مقابلہ سب سے تھا اور اللہ نے ہمیں سرخرو کیا۔
نجی ٹی وی چینل ’’دنیا نیوز ‘‘ کے مطابق سابق وزیر اعظم نواز شریف کی نا اہلی پر خالی ہونے والی اس سیٹ پر آج ملکی تاریخ کے بڑے انتخابی معرکے میں مسلم لیگ نون ،تحریک انصاف ، پیپلز پارٹی ،ملی مسلم لیگ ،جماعت اسلامی سمیت دیگر امیدوارمیدان میں تھے ، غیر سرکاری و غیر حتمی نتائج کے مطابق مسلم لیگ ن کی امیدوار اور سابق وزیر اعظم میاں محمد نواز شریف کی اہلیہ بیگم کلثوم نواز نے 61254 ووٹ حاصل کر کے پاکستان تحریک انصاف کی ڈاکٹر یاسمین راشد کو 14188 ووٹوں سے شکست دے کر نئی تاریخ رقم کر دی ہے ،ڈاکٹر یاسمین راشد نے 47066 ووٹ حاصل کئے جبکہ ملی مسلم لیگ کے حمایت یافتہ آزاد امیدوار محمد یعقوب شیخ نے 4268 ووٹ لے کر تیسری اور پیپلز پارٹی کے فیصل میر نے 2520 ووٹ حاصل کر کے چوتھی پوزیشن حاصل کی ۔واضح رہے کہ بیگم کلثوم نواز علاج کے سلسلہ میں ان دنوں لندن میں مقیم ہیں جبکہ ان کی اس حلقہ میں ساری انتخابی مہم ان کی صاحبزادی مریم نواز نے چلائی تھی ۔سابق وزیر اعظم نواز شریف کی نا اہلی پر خالی ہونے والی اس سیٹ پر آج ملکی تاریخ کے بڑے انتخابی معرکے میں پولنگ کا وقت 5بجے ختم ہونے کے بعد گنتی کا عمل تیزی کے ساتھ جاری رہا اور جیسے جیسے مختلف پولنگ سٹیشن سے مسلسل نتائج آ تے رہے مسلم لیگ ن اور پی ٹی آئی کارکنوں میں جوش و خروش بڑھتا رہا ،بیگم کلثوم نواز کی کامیابی کے ساتھ ہی مسلم لیگی متوالوں کے ڈھول کی تھاپ پر بھنگڑے ،رقص اور آتش بازی کا شاندار مظاہرہ کیا گیا ۔
نتائج کی آمد کے بعد تحریک انصاف کی امیدوار ڈاکٹر یاسمین راشد نے الیکشن کمیشن کے خلاف عدالت سے رجوع کرنے کا اعلان کرتے ہوئے کہا کہ میں پہلے ہی کہہ چکی تھیں کہ وہ ہاریں یا جیتیں؟ الیکشن کمیشن کے خلاف عدالت سے رجوع کریں گی،پری پول ریگنگ پر 25 درخواست دائر کی تھیں ،اس کو نہیں چھوڑوں گی اور اگر انھوں ںے سزا نہیں دی تو پھر دوسرے فورمز ہیں جہاں سے سزا لے سکتے ہیں۔ڈاکٹر یاسمین راشد نے اپنے ووٹرز کا شکریہ ادا کرتے ہوئے کہا کہ این اے 120 کے لوگوں نے بڑی جرات کے ساتھ میری انتخابی کیمپئن چلائی اور حکومت کی کسی دھونس میں نہیں آئے۔اس موقع پر پی ٹی آئی رہنما اعجاز چوہدری نے حلقے کی عوام کا شکریہ ادا کرتے ہوئے کہا کہعوام نے دو تہائی مارجن کو کم کردیا ہے،تمام صوبائی اور سرکاری محکمے ہمارے خلاف لڑ رہے تھے لیکن خواتین اور مرد کارکنوں کا شکرگزار ہیں جنھوں نے جرات سے کام کیا۔انہوں نے کہا کہ جب تک 29 ہزار ووٹوں کا فیصلہ عدالت نہیں کرتی تب تک نتائج کا اعلان نہیں کرنے دیں گے۔
واضح رہے کہ آج ہونے والے اس تاریخی انتخابی دنگل میں پولنگ صبح آٹھ بجے شروع ہو ئی جو کہ بغیر وقفے کے شام پانچ بجے تک جاری رہی ، اس دوران مسلم لیگ ن اور پی ٹی آئی کارکنان کے درمیان تلخ کلامی اور معمولی لڑائی جھگڑے کے واقعات بھی سامنے آئے جبکہ پولنگ سٹیشن کے اندر اور باہر پاک فوج اور رینجرز کی بھاری نفری تعینات رہی، پولنگ کے عمل کو شفاف بنانے کے لئے ووٹرز کے لئے قومی شناختی کارڈ لازمی قرار دیا گیا تھا ۔
این اے 120 میں کل3لاکھ 21ہزار 786ووٹرزرجسٹرڈ ہیں جس میں مرد ووٹرزکی تعدادایک لاکھ 79ہزار 642 جبکہ خواتین ووٹرزکی تعدادایک لاکھ 42ہزار 144ہے،الیکشن کمیشن کی جانب سے حلقے میں کل 220پولنگ سٹیشنزبنائے گئے تھے جبکہ پولنگ بوتھ کی تعداد 573تھی،جن میں مردوں کیلئے 312اورخواتین کیلئے 261پولنگ بوتھ بنائے گئے جبکہ 19پولنگ سٹیشنزمشترکہ بنائے گئے تھے۔