پاکستانی چیک پوسٹ تباہ کرنے کا بھارتی دعویٰ مسترد، پاک فوج نے انڈین چیک پوسٹیں تباہ کرنے کی ویڈیو جاری کردی
راولپنڈی (ڈیلی پاکستان آن لائن) پاک فوج نے پاکستان کی چیک پوسٹ تباہ کرنے کے بھارتی دعوے کو یکسر مسترد کردیا اور ایک بیان میں بتایا ہے کہ جنگی جنون میں مبتلا بھارتی فوج نے 13 مئی کو پاکستانی سول علاقے پر مارٹر گولوں اور آرٹلری سے حملہ کیاجس پر پاک فوج نے جوابی کارروائی کی اور دشمن کی چیک پوسٹیں تباہ کردیں، پاک فوج کی جانب سے بھارتی چیک پوسٹیں تباہ کرنے کی ویڈیو بھی جاری کی گئی ہے۔
پاک فوج کے شعبہ برائے تعلقات عامہ (آئی ایس پی آر) کے مطابق ڈی جی آئی ایس پی آر میجر جنرل آصف غفور کا سماجی رابطے کی ویب سائٹ ٹوئٹر پر بھارت کی جانب سے پاک فوج کی چیک پوسٹیں تباہ کرنے کے دعوے کو بے بنیاد قرار دیتے ہوئے کہنا تھا کہ پاکستانی فوج نے دشمن کی گولہ باری کے جواب میں بھر پور جوابی کارروائی کرتے ہوئے ان کی چیک پوسٹیں تباہ کی ہیں جبکہ اس کی ویڈیو بھی جاری کردی گئی ہے۔انہوں نے پریس ریلیز میں واقعے کی مزید تفصیلات بیان کرتے ہوئے کہا کہ بھارتی فوجیوں نے 13مئی کو بھمبر سیکٹرمیں اچانک بلااشتعال فائرنگ کردی جس کی زد میں آکر عام شہری شہید اور زخمی ہوگئے تھے ، یہی نہیں بھارتی اشتعال انگیزی کے سبب انفراسڑکچر کو بھی کافی نقصان پہنچا تھا اور جب پاک فوج کی جانب سے بھارتی اشتعال انگیزی کا جواب دیا گیا تو بھارت کو کافی نقصان اٹھانا پڑا اور ان کی پوسٹیں بھی تبا ہ ہوگئیں.
میجر جنرل آصف غفور نے کہا کہ پاک فوج بھارتی اشتعال انگیزی پرہی جوابی کارروائی کرتی ہے کیوں کہ پاکستان لائن آف کنٹرول پرامن کے فروغ کا خواہاں ہے اور خطے میں قیام امن کے لیے اپنی ذمہ داریاں احسن طریقے سے نبھاتا رہے گا۔
ویڈیو دیکھیں:
On 13 May 2017, India targeted innocent civilians. In befitting response Pak Army destroyed Indian posts in Nowshera Sec. 2/2. pic.twitter.com/jHLZVOoHSa
— Maj Gen Asif Ghafoor (@OfficialDGISPR) May 23, 2017