مرنا چاہتا ہوں یا مارنا چاہتا ہوں ، نظام سے علم بغاوت بلند کردیا ، ریاض پیر زادہ نے چوروں کو بے نقاب کیا ، ابھی اور لوگ بے نقاب ہوں گے :شیخ رشید
اسلام آباد (ڈیلی پاکستان آن لائن)عوامی مسلم لیگ کے سربراہ شیخ رشید نے کہاہے کہ ریاض پیر زادہ نے چوروں کو بے نقاب کیااور بھی لوگ بے نقاب ہوں گے ، مرنا چاہتا ہوں یا مارنا چاہتا ہوں ، نظام سے علم بغاوت بلند کردیا ،،2میں فیل ،3میں سپلی آگئی اور کہا جاتا ہے کہ پپو پاس ہوگیا، میں عمران خان کا ساتھی ہوں اور یہ ہی آخری امید ہیں، گھی سیدھی انگلی سے نہ نکلا تو خان صاحب کی قیادت میں ٹیڑھی انگلی سے نکالیں گے۔
تفصیلات کے مطابق شیخ رشید کا تحریک انصاف کے جلسے سے خطاب کرتے ہوئے کہنا تھا کہ آج ملک میں وزیرخارجہ ہوتا تواسمبلی میں جنرل راحیل شریف کی تعیناتی پربحث ہوتی جبکہ طارق فاطمی، پرویز رشید اور راو تحسین کو بھی قربانی کی بھینٹ چڑھایا جا رہا ہے۔پانامہ کیس کی سماعت کے دوران دو ججوں نے کہا وزیراعظم صادق اور امین نہیں جبکہ تین نے کہا کہ انہیں 60دن کاوقت دیا جائے،پانچ ججوں نے کہا کہ قطری خط فراڈ ہے ، کاغذات فضول ہیں،پیسہ کہاں گیا؟،یہی نہیں ججوں نے فیصلے میں میرے متعلق بہت اچھے جملے استعمال کیا حالانکہ میں ایک چھوٹا سا وکیل ہوں۔انہوں نے کہا کہ میں پاکستانی وکلا کو دعوت دیتا ہوں کہ وہ 6 مئی کو سڑکوں پر نکلیں اورپورا پاکستان ان کا تاریخی استقبال کرے گا ، وکلا بھی جانتے ہیں کہ عوام واقعی تبدیلی چاہتے ہیں اور قوم نے عمران خان سے امید لگائی ہے۔
شیخ رشید نے کہا کہ ریاض پیر زادہ نے چوروں کو بے نقاب کیااور بھی لوگ بے نقاب ہوں گے ،میں نواز شریف سے سوال کرتا ہوں کہ کہاں گئی نندی پور کی بجلی اور بھاشا ڈیم؟میں زندگی کے اس موڑ پر نظام سے علم بغاوت کرنا چاہتا ہوں، مرنا چاہتا ہوں یا مارنا چاہتا ہوں۔اگر گھی سیدھی انگلی سے نہیں نکلا تو کوئی بات نہیں میں خان صاحب کی قیاد ت میں ٹیڑھی انگلی سے نکال کر دکھاوں گا،اس وقت ساری قوم کا ایک ہی نعرہ ہے کہ ”گو نواز گو“۔