مرکل تم نازی اقدامات کررہی ہو ، اردگان ، اور ترکی کے درمیان ٹھن گئی

علاقائی

 استنبول(مانیٹرنگ ڈیسک/ آن لائن)جرمنی اور ترکی کے درمیان ٹھن گئی ہے ۔ترکی کے صدر طیب اردگان نے کہا ہے کہ جرمنی کردوں کو ترکی کے خلاف استعمال کرنے کے لئے ان کی حمایت کر رہا ہے۔ جرمنی ترک شہریوں اور ترک وزرا کے خلاف اقدامات کر رہا ہے۔ جرمن چانسلر انجیلا میرکل ’نازی اقدامات‘ کر رہی ہیں۔جرمنی ترک پاشندوں سے ملاقات کے لئے سیاسی کارکنوں اور وزرا کو ہراساں کرکے جرمنی میں ترک پاشندوں کے عوامی اجتماعات میں ان کی شرکت پر پابندی عائد کر رہا ہے۔ترک ٹیلی ویژن پر قوم سے خطاب کے دوران صدر اردگان نے جرمن چانسلر کو کڑی تنقید کا نشانہ بناتے ہوئے انہیں مخاطب کرکے کہا کہ ’’اس وقت تم نازی اقدامات کی مرتکب ہو رہی ہو۔‘‘ خبر رساں ادارے نے لکھا ہے کہ ترک سربراہ مملکت کا یہ بیان دونوں ملکوں کے درمیان پہلے ہی سے بہت کشیدہ تعلقات میں مزید خرابی کی وجہ اس لیے بنا کہ اردگان نے نے چانسلر میرکل کو مخاطب کرنے کے لیے جو لفظ استعمال کیا، وہ رسمی طرز تخاطب والا ’آپ‘ نہیں بلکہ ترک زبان میں ’تم‘ یا ’تو‘ کے لیے استعمال ہونے والا لفظ تھا۔واضح رہے کہ ترکی میں طیب اردگان نے آئینی ترامیم کے لئے ریفرنڈم کا اعلان کیا ہے جس کے بعد یورپی یونین کے ممالک ترکی کے خلاف بیان بازی کر رہے ہیں۔