وہاب ریاض نے برائن لارا کو دورہ پاکستان کی دعوت دیدی
لاہور (مانیٹرنگ ڈیسک) پاکستان کرکٹ ٹیم کے فاسٹ باﺅلر وہاب ریاض نے ویسٹ انڈیز کے عظیم بلے باز برائن لارا کو پاکستان آنے کی دعوت دی ہے اور کہا ہے کہ لارا کی میزبانی ان کیلئے اعزاز کی بات ہو گی۔
تفصیلات کے مطابق برائن لارا نے ورلڈ کپ کوارٹر فائنل میں آسٹریلیا کے خلاف وہاب ریاض کی شاندار کارکردگی کو سراہتے ہوئے ان سے ملنے کی خواہش ظاہر کی تھی۔ آسٹریلیا کے خلاف کھیلے گئے کوارٹر فائنل میں وہاب ریاض کی شین واٹسن کے خلاف باﺅلنگ کو دنیا بھر کے عظیم کرکٹرز کی جانب سے سراہا گیا اور بڑے سے بڑا کھلاڑی بھی ان کے گن گانے پر مجبور ہو گیا۔ وہاب ریاض کی شاندار باﺅلنگ پر برائن لارا، شین وارن، شین واٹسن، مائیکل کلارک سمیت دنیا بھر کے ماہرین اور سابق کھلاڑیوں نے بہت تعریف کی تھی۔
برائن لارا نے ایک بھارتی پروگرام میں گفتگو کرتے ہوئے آئی سی سی کی جانب سے وہاب پر جرمانہ عائد کئے جانے پر کھیل کی عالمی گورننگ باڈی کو تنقید کا نشانہ بناتے ہوئے ان کا جرمانہ ادا کرنے کی پیشکش بھی کی تھی۔ ان کا کہنا تھا کہ ”جہاں تک میرا معاملہ ہے تو یہ بورڈ کے دائرہ اختیار سے باہر ہے اور میں ان سے ملنے کا مزید انتظار نہیں کر سکتا، میں اس لڑکے (وہاب) سے ملنا چاہتا ہوں، میں جرمانہ ادا کروں گا“۔
انہوں نے وہاب پر جرمانے کے فیصلے کو احمقانہ قرار دیتے ہوئے کہا کہ فاسٹ باؤلر کے سامنے شین واٹسن سکول کے بچے لگ رہے تھے۔ وہاب ریاض نے بھی منگل کے روز ماضی کے عظیم کرکٹر کی جانب سے تعریف کئے جانے پر ان کا شکریہ ادا کیا اور مائیکرو بلاگنگ ویب سائٹ ”ٹوئٹر“ پر جاری ایک پیغام میں انہیں دورہ پاکستان کی دعوت دی ہے۔ انہوں نے اپنے پیغام میں کہا ہے کہ ” میرے یہ بڑے فخر اور اعزاز کی بات ہے کہ لیجنڈ برائن لارا مجھ سے ملنے کے خواہشمند ہیں۔ میں اس عظیم انسان کو پاکستان آنے کی دعوت دیتا ہوں اور ان کی میزبانی میرے لئے باعث فخر ہوگی“۔
