لندن میں بیٹھا عدالتی بھگوڑا عدلیہ پر حملہ آور، راناثناءاللہ کے فرمودات کھلم کھلا اعلان جنگ ہیں: شیخ رشید
راولپنڈی (ڈیلی پاکستان آن لائن) عوامی مسلم لیگ کے سربراہ شیخ رشید نے کہا ہے کہ لندن میں بیٹھا عدالتی بھگوڑا عدلیہ پر حملہ آور ہے،وزیر داخلہ راناثناءاللہ کے فرمودات کھلم کھلا اعلان جنگ ہیں۔
سماجی رابطے کی ویب سائٹ ٹویٹر پر جاری بیان میں سابق وزیر داخلہ شیخ رشید کا کہنا ہے کہ لندن میں بیٹھا مفرور سسلین مافیا کا عملی مظاہرہ کر رہا ہے۔ بھوک کےمارے لوگ راشن کے لیے جانیں دے رہے ہیں۔ امید ہے اس ہفتے میں عدلیہ کا آئینی اور قانونی تاریخی فیصلہ آ جائے گا۔ پنجاب میں 10دن کے لیے رینجرز کا لگانا حکومت کی نیتوں کی نشاندہی کرتا ہے۔
انہوں نے کہا کہ رانا ثناءاللہ کے فرمودات کھلم کھلا اعلان جنگ اور عوام دشمنی کےمترادف ہیں، وزیر خزانہ کے بیانات نااہلی کا اعتراف ہیں۔ جو سپریم کورٹ کے خلاف اعلان جنگ کرے گا تو ساری قوم سڑکوں پر ہو گی۔ حکومت کے بیانات بتاتے ہیں کہ وہ آئین اور قانون کا فیصلہ ماننے کے لیے تیار نہیں ہیں تو پھر عوام کے الیکشن کے مقابلے کے لیے تیار رہیں۔
شیخ رشید کا مزید کہنا ہے کہ الیکشن ہی ملک کو افراتفری اور خون خرابے سے بچا سکتا ہے، عدالتی اصلاحات بل آئین سےمتصادم ہے۔ ملک بندگلی میں داخل ہو چکا ہے، آنے والا ہفتہ اہم ترین ہو گا۔ حکومت عدلیہ پر ہر طرف سے دباؤ ڈال رہی ہے، عدلیہ وہی کرے گی جو آئین اور قانون کے مطابق ہو گا۔ پوری قوم عدلیہ کےساتھ کھڑی ہے، حکومت نے ملک کو داؤ پر لگا دیا ہے۔
