سیاسی بحران کی ذمہ داری کا حقیقی تعین کرنا ہے تو جنرل پاشا سے احتساب شروع کریں ،خورشیدشاہ
اسلام آباد(ڈیلی پاکستان آن لائن)پیپلزپارٹی کے سینئر رہنما اور رکن قومی اسمبلی خورشیدشاہ نے کہاہے کہ ضد اور انا نے ملک کو دلدل تک پہنچایا ہے،سیاسی بحران کو حل کرنے کی بجائے سنگین آئینی بحران پیدا کر دیاگیا،سیاسی بحران کی ذمہ داری کا حقیقی تعین کرنا ہے تو جنرل پاشا سے احتساب شروع کریں ، جنرل ظہیر اسلام ، جنرل فیض سب نے عمران خان کی آبیاری کی۔
نجی ٹی وی چینل ہم نیوز کے مطابق خورشیدشاہ کاکہناتھا کہ عمران خان کو مسلط کرنا ہی ملک کودرپیش خرابی کی اصل بنیاد ہے،اب صرف فل کورٹ، فل کورٹ ورنہ صرف پچھتاوا۔
پیپلزپارٹی کے سینئر رہنما کاکہناتھا کہ سیاسی بحران پیچھے رہ گیا، آئینی بحران نے ملک کو لپیٹ میں لئے لیا، آئینی وسیاسی بحران کے حل کیلئے کوئی ادارہ بچا نہ شخصیت،ان کاکہناتھا کہ ہم بندگلی میں پہنچ چکے ہیں، اگر کوئی راستہ بن سکتا تووہ فل کورٹ ہے،فل کورٹ کے ذریعے عدلیہ آئینی بحران سے نکلنے کی راہ تلاش کرے۔
خورشیدشاہ نے کہا کہ آئینی و سیاسی معاملات بند گلی میں چلے جائیں تو گھڑی کی ٹک ٹک شروع ہو جاتی ہے، تجربے سے بتا رہاہوں کہ وقت بہت کم ہے، حل نہ نکالا تو کچھ بھی ہو سکتا ہے،اگر کچھ غلط ہوا تو اہم ادارے ذمہ دار ہوں گے ۔
