برطانوی وزیر اعظم نے ایک ہفتے میں پرائیویٹ جیٹ طیاروں پر 5 لاکھ یورو سے زیادہ خرچ کردیے
لندن (ڈیلی پاکستان آن لائن) برطانیہ کے وزیر اعظم رشی سنک نے گزشتہ سال صرف ایک ہفتے کے دوران ٹیکس دہندگان کی پانچ لاکھ یورو (تقریباً ساڑھے 15 کروڑ روپے) سے زیادہ رقم نجی طیاروں پر خرچ کی۔
دی گارڈین کے مطابق برطانیہ کی حکومت نے مصر میں کوپ 27 سربراہی اجلاس میں رشی سنک کی شرکت کے لیے نجی جیٹ پر ایک لاکھ 8 ہزار یورو خرچ کیے۔ ایک ہفتہ بعد وہ بالی انڈونیشیا میں تین لاکھ 40 ہزار یورو خرچ کرکے جی 20 سربراہی اجلاس کیلئے راؤنڈ ٹرپ پر روانہ ہوئے۔ دی گارڈین کی رپورٹ میں کہا گیا ہے کہ رشی سنک کے دسمبر میں لٹویا اور ایسٹونیا کے سفر پر 62 ہزار 498 یورو کے سفری اخراجات آئے، جن میں ڈھائی ہزار یورو کے ذاتی اخراجات تھے۔
لبرل ڈیموکریٹس نے اخراجات کو 'ٹیکس دہندگان کے پیسوں کا چونکا دینے والا ضیاع' قرار دیا ہے۔ پارٹی کے ٹویٹ میں کہا گیا ہے 'یہ ایک ایسے وقت میں ٹیکس دہندگان کے پیسے کا حیران کن ضیاع ہے جب لوگ اپنے بل ادا کرنے کے لیے جدوجہد کر رہے ہیں۔ پھر بھی یہ کنزرویٹو حکومت مکمل طور پر کنٹرول سے باہر ہے۔'
