اسلام آباد ہائیکورٹ، عمران خان کی نا اہلی کیس خارج کرنے کی استدعا
اسلام آباد (ڈیلی پاکستان آن لائن) چیئرمین تحریک انصاف عمران خان نے اپنے خلاف اسلام آباد ہائیکورٹ میں زیر سماعت نا اہلی کیس خارج کرنے کی استدعا کر دی۔
نجی ٹی وی چینل ایکسپریس نیوز کے مطابق سابق وزیراعظم عمران خان کی جانب سے نا اہلی کیس میں جمع کروائے گئے ابتدائی بیان میں کہا گیا ہے کہ بطور رکن اسمبلی آفس چھوڑ چکا لہٰذا درخواست قابل سماعت نہیں، آرٹیکل 199 کے تحت یہ عدالت اس درخواست کو نہیں سن سکتی، عمران خان کی جانب سے جواب میں فیصل واوڈا کیس کا بھی حوالہ دیا گیا۔
عمران خان نے کیس سننے والے موجودہ چیف جسٹس عامر فاروق پر باالواسطہ اعتراض بھی اٹھا دیا، جمع کروائے گئے جواب میں مزید کہا کہ کیس پر نااہلی کی درخواست اسلام آباد ہائیکورٹ پہلے ہی خارج کر چکی، ہائیکورٹ کے 4 جج صاحبان معاملے کو سننے سے معذرت بھی کر چکے، عبدالوہاب بلوچ نے اسی معاملے پر پہلے درخواست دائر کی تھی، یکم اگست 2018 کو جسٹس عامر فاروق کیس کو سننے سے معذرت کر چکے، جو جج پہلے کیس سے معذرت کر چکے، وہ دوبارہ اسے نہیں سن سکتے، عدالت ہٰذا کیس کے حوالے سے پہلے بھی فیصلہ کر چکی ہے۔
