ماں باپ کا بچے کا ٹکٹ خریدنے سے انکار، ایئر پورٹ پر ہی چھوڑ کر چلے گئے
تل ابیب(مانیٹرنگ ڈیسک) اسرائیل میں ایک یورپی ماں باپ نے اپنے بچے کا ٹکٹ خریدنے سے انکار کر دیا اور بچے کو ایئرپورٹ پر چھوڑ کر ہی پرواز میں سوار ہو گئے۔ میل آن لائن کے مطابق یہ واقعہ تل ابیب کے بین گوریان ایئرپورٹ پر پیش آیا۔ ان میاں بیوی کا تعلق یورپی ملک بیلجیم سے تھا اور وہ تل ابیب سے برسلز جانے والی پرواز میں سوارہونے کے لیے آئے تھے۔
جوڑے کے پاس اپنے دو ٹکٹ ہی تھے۔ جب ان سے بچے کا ٹکٹ خریدنے کو کہا گیا تو انہوں نے ہنگامہ کھڑا کر دیااور بچے کو وہیں چھوڑ کر ریان ایئر کی پرواز میں سوار ہو گئے۔ عملے نے پولیس کو واقعے سے مطلع کیا جنہوں نے آ کر ہوائی جہاز سے اس جوڑے کوحراست میں لے لیا اور ان کے پاسپورٹس ضبط کر لیے۔
رپورٹ کے مطابق اس جوڑے کے بچے کی عمر ایک سال کے لگ بھگ تھی اور وہ سٹرولر میں تھا۔ اسرائیلی پولیس کی طرف سے یورپی میاں بیوی کی گرفتاری کی تصدیق کی گئی ہے اور بتایا گیا ہے کہ ان سے مزید تفتیش کی جا رہی ہے۔ ایئرپورٹ پر ریان ایئرڈیسک کے منیجر کا کہنا تھا کہ ان میاں بیوی کی حرکت دیکھ کر وہاں موجود ہر شخص ہکا بکا رہ گیا۔ ہمیں اپنی آنکھوں پر یقین ہی نہیں آ رہا تھا کہ کوئی ماں باپ کس طرح ٹکٹ کے پیسے بچانے کے لیے اپنے بچے کو اس طرح لاوارث چھوڑ کر جا سکتے ہیں۔
