پی ٹی اے نے توہین آمیز مواد کی وجہ سے وکی پیڈیا کو ڈی گریڈ کردیا
اسلام آباد (ڈیلی پاکستان آن لائن) پاکستانی ٹیلی کمیونیکیشن اتھارٹی (پی ٹی اے) نے غیر قانونی اور توہین آمیز مواد کو بلاک نہ کرنے پر اور اپنے پلیٹ فارم سے نہ ہٹانے کی وجہ سے پاکستان میں وکی پیڈیا کی سروسز کو ڈی گریڈ کردیا۔
ترجمان پی ٹی اے کی جانب سے جاری بیان کے مطابق قابل اطلاق قانون اور عدالتی احکامات کے تحت نوٹس جاری کرکے مذکورہ مواد کو بلاک کرنے اور ہٹانے کیلئے وکی پیڈیا سے رابطہ کیا گیا تھا، سماعت کا موقع بھی فراہم کیا گیا تاہم پلیٹ فارم نے نہ تو توہین آمیز مواد ہٹانے کے حکم کی تعمیل کی اور نہ ہی اتھارٹی کے سامنے پیش ہوا۔ پی ٹی اے کی ہدایات پر جان بوجھ کر عدم تعمیل کے پیش نظر وکی پیڈیا کی سروسز کو 48 گھنٹوں کیلئے ڈی گریڈ کردیا گیا ہے اور رپورٹ کردہ مواد کو بلاک کرنے اور ہٹانے کی ہدایت کی گئی ہے۔
پی ٹی اے کا کہنا ہے کہ وکی پیڈیا کی جانب سے تعمیل نہ کرنے کی صورت میں پلیٹ فارم پاکستان کے اندر بلاک کردیا جائے گا۔پی ٹی اے کا کہنا ہے کہ رپورٹ کردہ غیر قانونی مواد کو بلاک کرنے یا ہٹانے کے بعد ہی ویب سائٹ پر عائد پابندیاں اٹھائے جانے پر دوبارہ غور کیا جائے گا۔
