فواد چوہدری کا دورہ سندھ ملتوی

فواد چوہدری کا دورہ سندھ ملتوی

  

اسلام آباد(سٹاف رپورٹر ، مانیٹرنگ ڈیسک ) وفاقی وزیر اطلاعات فواد چوہدری نے بدلتے حالات میں سندھ کا دورہ ملتوی کردیا۔تحریک انصاف کے سندھ میں تبدیلی مشن اور پیپلز پارٹی کا فارورڈ بلاک بنانے کے سلسلے میں فواد چوہدری نے تین روزہ دورے پر گزشتہ روز سندھ پہنچنا تھا لیکن پھر صبح سویرے سپریم کورٹ میں جعلی اکاؤنٹس کیس کی سماعت سے صورتحال یکسر تبدیل ہوگئی۔چیف جسٹس نے وزیراعلیٰ سندھ مراد علی شاہ کا نام ای سی ایل میں ڈالنے پر برہمی کا اظہار کرتے ہوئے کہا کہ ایک جے آئی ٹی رپورٹ پر حکومت گرانے کی اجازت نہیں دے سکتے اور گورنر راج لگا تو اسے ختم کرنے میں ایک سیکنڈ لگے گا۔وفاقی وزیر اطلاعات فواد چوہدری نے سندھ کا دورہ ملتوی کردیا ہے۔ انہوں نے کراچی، بدین، سکھر اور لاڑکانہ کا دورہ کرنا تھا جس کے دوران پیر پگاڑا، لیاقت جتوئی، ذوالفقار مرزا ، فہمیدہ مرزا، ایاز پلیجو اور دیگر رہنماؤں سے ملاقاتیں کرنا تھیں۔گزشتہ روز فواد چوہدری کا کہنا تھا کہ پیپلز پارٹی کسی اور کو وزیر اعلیٰ بنالے تو کوئی اعتراض نہیں ہوگا، وزیراعلیٰ سندھ مراد علی شاہ جعلی اکاؤنٹس کیس اور منی لانڈرنگ کی تحقیقات کرنے والی جے آئی ٹی کی رپورٹ میں مرکزی ملزم ہیں اس لیے وہ مستعفی ہوجائیں۔

مزید :

صفحہ اول -