تحریک انصاف نے چوہدری پرویز الٰہی کا اہم ترین ذمہ داری سونپ دی، ایسی وکٹ پر میدان میں اتار دیاکہ ن لیگ کی پریشانی کی حد نہ رہے گی
لاہور (ویب ڈیسک) پنجاب میں حکومت کی تبدیلی اور مسلم لیگ ن کی کوششوں کا توڑ کرنے کے لیے تحریک انصاف نے حکمت عملی تیار کرلی جس کے تحت چودھری پرویز الٰہی کو پنجاب کی اہم وکٹ پر میدان میں اتارنے کا فیصلہ کیا گیا ہے۔
دنیانیوز کے مطابق وزیراعظم اور چودھری برادران کے درمیان 3 روز قبل ہونے والی ملاقات میں معاملات طے پاگئے۔ وزیراعظم عمران خان نے موجودہ صورتحال سے نکلنے کے لیے چودھری پرویز الٰہی کو اہم ذمہ داری سونپ دی ہے۔ پرویز الٰہی ناراض اراکین سے رابطے کریں گے جبکہ ن لیگ کی جانب سے اگر کوئی پیش رفت ہوتی ہے تو وہ اس کا توڑ بھی کریں گے۔
ذرائع کا دعویٰ ہے کہ وزیراعظم عمران خان نے چودھری پرویز الٰہی کو گرین سگنل بھی دے دیا ہے کہ اگر ن لیگ تحریک انصاف کے ارکان توڑتی ہے تو اسپیکر پنجاب اسمبلی ن لیگ کے اندر موجود اپنے ہمدردوں کی مدد سے فارورڈ بلاک قائم کریں گے۔ ذرائع کے مطابق ملاقات میں چودھری برادران نے وزیراعظم کو پنجاب کی موجودہ صورتحال کے حوالے سے اپنی تشویش سے آگاہ کیا اور بتایا کہ مسلم لیگ ن کی جانب سے حکومت کی تبدیلی کے لیے کوششیں کی جا رہی ہیں۔
چودھری برادران نے وزیراعظم کو بتایا کہ تحریک انصاف کے ناراض اراکین اور آزاد ارکان تبدیلی میں اہم کردار ادا کرسکتے ہیں جبکہ تحریک انصاف کے کچھ ناراض اراکین ن لیگ سے مسلسل رابطے میں بھی ہیں، اگر ان اراکین کے تحفظات دور نہ کئے گئے تو وہ اپنی وفاداریاں تبدیل کر سکتے ہیں۔ حکومتی اراکین اسمبلی کو نہ تو فنڈز مل رہے ہیں اور نہ ہی ان کے جائز کام ہورہے ہیں اگر یہی صورتحال رہی تو بڑا نقصان ہوسکتا ہے۔
