رمیز راجہ ’شادی شدہ کرکٹ ٹورنامنٹ‘ میں حصہ لیں گے

رمیز راجہ ’شادی شدہ کرکٹ ٹورنامنٹ‘ میں حصہ لیں گے
رمیز راجہ ’شادی شدہ کرکٹ ٹورنامنٹ‘ میں حصہ لیں گے
سورس:   Twitter

  

لاہور (ڈیلی پاکستان آن لائن) قومی کرکٹ ٹیم کے سابق ٹیسٹ کرکٹر اور موجودہ کمنٹیٹر رمیز راجہ اب ’شادی شدہ کرکٹ ٹورنامنٹ‘ میں حصہ لیں گے جس کا اعلان انہوں نے سوشل میڈیا کے ذریعے کیا۔ 

تفصیلات کے مطابق سابق کرکٹر نے ٹوئٹر پر عام گلی محلوں میں ہونے والے کرکٹ ٹورنامنٹ کا ایک پوسٹر شیئر کیا اور مداحوں کو بتایا کہ وہ بھی اس ٹورنامنٹ میں حصہ لے رہے ہیں۔ رمیز راجہ نے اپنے ٹوئٹ میں پوسٹر شیئر کرتے ہوئے بتایا کہ ’میں نے یہ ٹورنامنٹ کھیلنے کیلئے درخواست جمع کرادی ہے۔‘

رمیز راجہ کی جانب سے شیئر کئے گئے انوکھے کرکٹ ٹورنامنٹ میں حصہ لینے کیلئے جو شرائط رکھی گئی ہیں وہ خاصی دلچسپ اور عجیب ہیں۔ کرکٹ ٹورنامنٹ میں حصہ لینے کے خواہشمند حضرات کا شادی شدہ ہونا، صاحب اولاد ہونا جبکہ اس کے ساتھ ہی عمر کی حد 35 سال مقرر کی گئی ہے۔

رمیز راجہ کی جانب سے شیئر کئے گئے پوسٹر میں بتایا گیا ہے کہ ٹورنامنٹ بمقام گورنمنٹ ہائی سکول چک نمبر 17 کے گراؤنڈ میں 25، 26 اور 27 بروز جمعہ ہفتہ اور اتوار کو کھیلا جائے گا۔ یہ بھی بتایا گیا ہے کہ ٹورنامنٹ حاجی عبدالرحمن نے منعقد کیا ہے کیونکہ وہ بوڑھوں کو جوانی کی یادیں تازہ کرنے کا تحفہ دینا چاہتے ہیں۔

ٹورنامنٹ میں حصہ لینے والی ٹیم کو 500 روپے انٹری فیس دینا ہوگی، کھلاڑی کو عمر کی شرط پر پورا اترنے کیلئے شناختی کارڈ ساتھ لانا ہو گا جبکہ انتظامیہ کی جانب سے طبی امداد اور ڈاکٹرز کا انتظام بھی کیا جائے گا۔ یہی نہیں بلکہ اس انوکھے کرکٹ ٹورنامنٹ میں کھلاڑیوں کیلئے کھانے اور میچ وقفے میں چائے کا اہتمام بھی کیا جائے گا۔

مزید :

کھیل -