9 مئی کے الزامات پر گرفتار کارکنوں کو جیلوں سے نکالنا ہماری ذمہ داری ہے، فواد چودھری نے اعلان کردیا
راولپنڈی (ویب ڈیسک) پاکستان تحریک انصاف کے سابق رہنما اور سیاستدان فواد چوہدری نے کہا ہے کہ پی ڈی ایم حکومت کو کھل کر کھیلنے کا موقع نہیں دیں گے،9 مئی کو گرفتار کارکنوں کو جیلوں سے نکالنا ہماری ذمہ داری ہے۔ ان حالات میں اس حکومت کی اپوزیشن کو خالی نہیں چھوڑ سکتے اور ان کو کھل کر کھیلنے کا موقع نہیں دے سکتے، آج بھی اپنے نظریئے کے ساتھ کھڑے ہیں اور ملکی بہتری کے لیے کردار ادا کرنے کو تیار ہیں۔
"ایکسپریس نیوز" کے مطابق عمران اسماعیل کے ہمراہ میڈیا سے گفتگو کرتے ہوئے فواد چوہدری نے کہا کہ ملک کے25 کروڑ عوام کو نواز شریف، زرداری اور پی ڈی ایم میں شامل جماعتوں کے سہارے پر نہیں چھوڑ سکتے۔ملک کی موجودہ صورت حال اور مسائل کے حوالے سے پی ٹی آئی کی سابق قیادت سے گفتگو اور مذاکرات ہوئے، اسد عمر سے رابطہ ہوا، اسد قیصر اور پرویز خٹک سمیت سب سے رابطہ ہوا، تمام قیادت ملک کو مسائل سے نکالنے اور مستحکم پاکستان کی خواہش مند ہے اور امید ہے کہ ہم اس میں کامیاب ہوجائیں گے۔
انہوں نے کہا کہ ہم ملک میں سیاسی استحکام کے لیے اپنی سیاسی کوششیں جاری رکھیں گے، موجودہ سیاسی اور معاشی بحران کی واحد ذمہ دار صرف پی ڈی ایم ہے، اب پاکستان کو مستقل مستحکم حل کی طرف جانا ہوگا جس کے لیے شاہ محمود قریشی بھی کردار ادا کرنے کیلیے تیار ہیں۔
فواد چوہدری نے کہا کہ 9مئی کو جو ہوا نہیں ہونا چاہیے تھا مگر اُس کے بعد متعدد بے گناہوں کو پکڑ کر جیلوں میں ڈالا گیا ہے، بے گناہ کارکنوں کو جیلوں سے باہر نکالنا ہماری ذمہ داری ہے اور ہم اپنی ذمہ داری ادا کریں گے۔ ہماری اپنے سابق ساتھیوں سمیت تمام لوگوں کے ساتھ اچھی گفتگو ہوئی ہے، امید ہے کہ کوئی اچھا حل نکلے گا۔
