ریلوے سٹیشن لاہور کو دھماکے سے اڑانے کی منصوبہ بندی کرنیوالے مجرم کی سزا کیخلاف دائر اپیل مسترد

ریلوے سٹیشن لاہور کو دھماکے سے اڑانے کی منصوبہ بندی کرنیوالے مجرم کی سزا ...

لاہور(نامہ نگار خصوصی )لاہور ہائیکورٹ نے ریلوے سٹیشن لاہور کو دھماکے سے اڑانے کی منصوبہ بندی کرنے والے مجرم کی سزا کے خلاف دائر اپیل مسترد کر دی۔جسٹس صداقت علی خان نے کیس کی سماعت کی۔مجرم عبدالغنی کے وکیل نے عدالت کو آگاہ کیا کہ اس کے موکل کے خلاف پولیس نے جھوٹا اور بے بنیاد مقدمہ درج کیا۔انہوں نے کہا کہ انسداد دہشت گردی کی عدالت نے ناکافی گواہوں اور ثبوتوں کے باوجود مجرم کو عمر کی قید کی سزا کا حکم سنا رکھا ہے لہذا عدالت دہشت گردی عدالت کے فیصلے کو کالعدم قرار دے۔ڈپٹی پراسیکیوٹر جنرل پنجاب خرم خان نے عدالت کو آگاہ کیا کہ پولیس نے اپنے مخبر کی اطلاع پر مجرم عبدالغنی کو 3 کلو دھماکہ خیز مواد کے ہمراہ رنگے ہاتھوں گرفتار کیا۔مجرم عبدالغنی دھماکہ خیز مواد کے ساتھ ریلوے سٹیشن کو اڑانے کی منصوبہ کر کے آیا تھا لہذا اس کی اپیل مسترد کی جائے۔ عدالت نے فریقین کے وکلاء کے دلائل سننے کے بعد مجرم کی اپیل مسترد کر دی۔

مزید : صفحہ آخر