اسرائیلی مظالم پر عالمی برادری مجرمانہ خاموش کردار ترک کرے، گل محمد مرزا

لاہور(سٹی رپورٹر) پاک چائنہ بزنس کمیونٹی کے صدر گل محمد مرزا نے کہا ہے فلسطین پر جاری 7 اکتوبر سے بدترین اسرائیلی مظالم پر مغرب کا دوہرا معیار نہایت تکلیف دہ ہے ۔ مسلسل کئی ہفتوں سے ہر دن اور رات فلسطینیوں کے جنازے اٹھ رہے ہیں ۔ فلسطین میں جاری اسرائیلی مظالم پر عالمی برادری مجرمانہ خاموش کردار ترک کرے اور ظالم اسرائیل کیخلاف آواز اٹھائے ۔ فلسطین میں گولہ باری سے ہسپتال سکول رہائشی علاقے تباہ راکھ کا ڈھیر بن چکے ہیں ۔ اقوام متحدہ اور او آئی سی اسرائیلی مظالم رکوانے کیلئے سخت ترین لائحہ عمل اپنائیں ۔ 

فلسطینی نسل در نسل قبلہ اول کو صیہونی تسلط سے نکالنے کیلئے اپنی اولادیں گھر بار قربان کررہے ہیں ۔ طویل ترین جنگ سے بھی فلسطینی قوم کے جذبے کو شکست نہیں دی جاسکی ۔ پاکستان کے غیور عوام فلسطینی بھائیوں کے ساتھ آخری سانس تک کھڑے ہیں ۔ فلسطین کی آزادی اور قبلہ اول کی مسلمانوں کے پاس واپسی کی جدوجہد اور خون ناحق ضرور رنگ لائے گا ۔ یہ قربانیاں بیت المقدس کو آزادی ضرور نصیب کریں گی ۔