پاکستان سمیت دنیا بھر میں31اکتوبرکو شہروں کا عالمی دن منایاگیا

کراچی(اسٹاف رپورٹر)پاکستان سمیت دنیا بھر میں 31اکتوبرکوشہروں کا عالمی دن منایاگیا، شہرقائد ملک کا سب سے بڑا شہر ہونے کے باوجود حکومتی عدم توجہی کے باعث بے پناہ مسائل کا شکار ہے، شہری بنیادی سہولیات تک سے محروم ہے۔پاکستان سمیت دنیا بھر میں 31 اکتوبر ورلڈ سٹیز ڈے کے طور پر منایاگیا،جس کا مقصد شہری علاقوں کو درپیش مسائل کے حل، ترقی، عالمی تعاون کے فروغ اور مواقعوں کو اجاگر کرنا ہے، آبادی کے لحاظ سے کراچی دنیا کے 104 شہروں اور دنیا کے کئی ممالک سے بڑا ہے۔شہر کراچی جتنا بڑا ہے اس کے مسائل بھی اتنے ہی زیادہ ہیں تاہم ملکی ترقی میں اہم کردار ادا کرنے کے باوجود شہر قائد کے مسائل آج بھی توجہ طلب ہیں، ملک کے سب سے بڑے شہر اور معاشی حب کراچی کو اسکی اہمیت کے مطابق ترقی نہیں دی جا سکی، دو کروڑ سے زائد آبادی پر مشتمل اس میگا سٹی میں شہری بنیادی سہولیات تک سے محروم ہیں۔کراچی کی لاکھوں کی آبادی پینے کے صاف پانی کیلئے ترس رہی ہے، سڑکوں کی تباہ حالی، کچرے کا ناقص نظام اور بوسیدہ حال سیوریج سسٹم کے باعث شہری سخت مشکلات سے دوچار ہیں،اسٹریٹ کرائم کی وارداتیں بھی معمول بنی ہوئی ہیں،شہریوں کے تحفظ اور بنیادی سہولیات کی فراہمی کیلئے موثر اقدامات عرصہ سے التوا کا شکار ہیں۔