افغان کمیٹی نےوطن واپس آنیوالے مہاجرین کی مستقل آباد کاری کیلیے ورک مینوئل تشکیل دیدیا
کابل ( بی این اے )اپنے وطن واپس آنے والے مہاجرین کے لیے زمین کی تقسیم اور ان کی مستقل آباد کاری کے لیے قائم افغان کمیٹی نے اپنا ورک مینوئل تشکیل دیدیا۔ افغانستان کے وزیر ہاؤسنگ و شہری ترقی شیخ حمد اللہ نعمانی کی سربراہی میں واپس لوٹنے والے مہاجرین کے لیے زمینوں کی تقسیم اور ان کی مستقل آباد کاری کے لیے کمیٹی کا اجلاس ہوا، جس نے اپنے کام کا مینول تیار کرلیا۔
افغان حکومت کی ہدایات کے مطابق واپس لوٹنے والے مہاجرین کے مسائل کے حل کے لیے یہ کمیٹی قائم کی گئی ہے۔ کمیٹی اجلاس میں ہاؤسنگ سکیموں کے لیے زمین کا تعین، زمین کی آباد کاری، منصوبہ بندی، مستقل رہائش گاہوں کی تعمیر، پناہ گزینوں کی آباد کاری اور رہائش کی تقسیم وہ تمام موضوعات تھے جن پر مینول کی تیاری کے دوران جامع بحث کی گئی۔
اس کمیٹی کی سربراہی وزیر ہاؤسنگ وشہری ترقی شیخ حمد اللہ نعمانی کر رہے ہیں، وزارت زراعت و لائیو سٹاک، وزارت امور مہاجرین، وزارت پانی وبجلی،وزارت دیہی تعمیر نو و ترقی، واٹر سپلائی کمپنی، ادارہ تحفظ ماحولیات اور دی جنرل ڈائریکٹریٹ آف میونسپلٹیز اس کمیٹی بطور ممبر شامل ہیں۔ کمیٹی نے اپنی فعالیت شروع کر دی ہے۔
