اللہ سے ڈرتے ہیں تو ہماری عمروں میں کوئی بھی دن آخری ہو سکتا ہے،چیف جسٹس پاکستان کا چیئرمین پیمرا کے جواب پر جواب

اسلام آباد(ڈیلی پاکستان آن لائن)فیض آباد دھرنا نظرثانی کیس میں چیف جسٹس پاکستان نے چیئرمین پیمرا  سے کہاکہ اللہ آپ کو لمبی عمر دے، آپ کس سے ڈرتے ہیں؟چیئرمین پیمرا نے کہاکہ صرف اللہ سے ڈرتے ہیں،چیف جسٹس پاکستان نے چیئرمین پیمرا کے جواب پر جواب دیتے ہوئے کہاکہ اللہ سے ڈرتے ہیں تو ہماری عمروں میں کوئی بھی دن آخری ہو سکتا ہے۔

نجی ٹی وی چینل دنیا نیوز کے مطابق  فیض آباد دھرنا نظرثانی کیس میں چیف جسٹس پاکستان نےکہاکہ 3حکومتوں میں آپ چیئرمین پیمرا رہ چکے ہیں تینوں حکومتیں آپ سے خوش نہیں،نظرثانی درخواست پر دیکھیں کس کے دستخط ہیں؟سلیم بیگ صاحب! درخواست پر آپ کے دستخط ہیں، لکھا ہوا ہے آپ نے اختیارات کا استعمال کرکے اس کی منظوری دی،آپ دوسروں کے کندھوں پر بندوق نہ چلائیں،ذمہ داری لیں یہ نظرثانی آپ نے دائر کی،اللہ آپ کو لمبی عمر دے، آپ کس سے ڈرتے ہیں؟چیئرمین پیمرا نے کہاکہ صرف اللہ سے ڈرتے ہیں،چیف جسٹس پاکستان نے کہاکہ اللہ سے ڈرتے ہیں تو ہماری عمروں میں کوئی بھی دن آخری ہو سکتا ہے۔

جسٹس اطہر من اللہ نے کہاکہ ابصار عالم نے اس وقت کے وزیراعظم کو بھی خط لکھا،اس وقت وزیراعظم نوازشریف تھے،ہر وزیراعظم کرسی سے اتر کہتا ہے میں مجبور تھا،جو ابصار عالم نے کیا وہ ہر پبلک آفس ہولڈر کو کرنا چاہئے،ابصار عالم نے اس وقت کے وزیراعظم شاہد خاقان عباسی کو بھی بتایا۔

چیف جسٹس پاکستان نے کہاکہ آپ پر اس وقت دباؤ نہیں تھا تو اب آپ پر قانون کادباؤ ہے،ہمارے حتمی آرڈر سے پہلے کچھ اور کہنا چاہتے ہیں؟آپ ہمارے ساتھ گیم تو نہ کھیلیں،آپ کو تو خوش ہونا چاہئے تھا کہ سپریم کورٹ آپ کے پیچھے کھڑی ہے۔