وزیر اعلی بلوچستان نے شہداکے ورثا کوامدادی چیک دئے
ملتان،شجاع آباد(سٹی رپورٹر،نمائندہ پاکستان، نمائندہ خصوصی، ،خبر نگار) وزیر اعلی بلوچستان میر سرفراز بگٹی، ایم این اے سید عبدالقادر گیلانی، ڈپٹی کمشنر ملتان وسیم حامد سندھو، سٹی پولیس آفیسر ملتان صادق ڈوگر، اسسٹنٹ کمشنر سلمان ظفر اور ڈی ایس پی مہر وسیم سیال کے ہمراہ شجاع آباد پہنچے۔ میر سرفراز بگٹی نے بلوچستان میں سانحہ پنجگور اور سانحہ موسی خیل میں(بقیہ نمبر10صفحہ7پر )
دہشت گردوں کے حملے میں شہید ہونے والے مزدوروں کے ورثا سے اظہار تعزیت کیا۔ مزدور شہدا کے درجات کی بلندی کے لیے دعا کی۔ شہدا کے ورثا سے اظہارِ تعزیت و ہمدردی اور صبر جمیل کے لیے دعا کرائی۔ میسرفراز بگٹی نے میڈیا سے گفتگو میں کہا کہ اللہ تعالی شہدا کے درجات کو بلند کرے۔ شہدا کے ورثا کے غم میں برابر کے شریک ہیں۔ اللہ تعالی شہدا کے مقدس خون کا بدلہ لینے کی توفیق دے۔ دہشت گردی کے واقعات کی شدید مذمت کرتے ہیں۔ کسی بلوچ نے کسی پنجابی سرائیکی بھائی کو شہید نہیں کیا۔ دہشت گردوں کا کسی قوم یا مذہب سے تعلق نہیں۔ ملک عزیز کے خلاف ہونے والی ہر سازش کو ناکام بنائیں گے۔ معصوم لوگوں کے مقصد خون کے ایک ایک قطرے کا حساب لیں گے۔ دہشت گردوں نے معصوم پاکستانیوں کو شہید کیا۔ بلوچ ایک مہمان نواز قوم ہے. دہشت گردی ہماری روایت نہیں۔ پنجاب سے آکر لوگ بلوچستان کی ترقی میں کردار ادا کرتے ہیں۔ دہشت گردی کو جڑ سے اکھاڑ کر امن و امان قائم کریں گے۔ سارے بلوچ قبائل نے دہشت گردی کے واقعہ کی مذمت کی ہے۔ غم اور دکھ کو بنیاد بنا کر دہشت گردی کا خاتمہ کریں گے۔ اس واقعہ میں ملوث ایک بھی دہشت گرد نہیں بچے گا۔ بلوچستان میں شہید ہونے والے پنجاب کے شہدا کے بچوں کے 16 سال تک کے تعلیمی اخراجات حکومت بلوچستان برداشت کرے گی۔ شہدا کے خاندانوں کی کفالت بھی حکومت بلوچستان کرے گی۔ بلوچستان میں دہشت گردی میں بھارتی ایجنسی "را" کے ملوث ہونے کے مضبوط ثبوت موجود ہیں۔ " را" کے فنڈڈ لشکر بلوچستان میں دہشت گردی کر رہے ہیں۔ بلوچستان میں کام کرنے والے افراد کو مکمل تحفظ فراہم کیا جارہا ہے۔ بعد ازاں وزیراعلی بلوچستان میر سرفراز بگٹی نے سانحہ پنجگور اور سانحہ موسی خیل کے شہدا کے خاندانوں کو 15 لاکھ روپے اور زخمی مزدور کو 5 لاکھ روپے فی کس امدادی چیکس دئیے۔ ممبر قومی اسمبلی سید عبدالقادر گیلانی نے وزیر اعلی بلوچستان میر سرفراز بگٹی کی آمد اور شہدا کے ساتھ اظہار ہمدردی اور امداد پر انکا شکریہ ادا کیا۔ وزیراعلی بلوچستان میر سرفراز بگٹی کے ہمراہ بلوچستان اسمبلی کے اپوزیشن لیڈر، صوبائی وزیر کمیونیکیشن اینڈ ورکس بلوچستان سلیم احمد کھوسو، چیف سیکرٹری بلوچستان شکیل قادر خان، ایڈیشنل سیکرٹری داخلہ شہباز علی شاہ بھی تھے۔
