سکوتِ شام میں گونجی صدا اداسی کی | رحمان فارس |

سکوتِ شام میں گونجی صدا اداسی کی 

کہ ہے مزید اداسی دوا اداسی کی 

بہت شریر تھا میں اور ہنستا پھرتا تھا 

پھر اک فقیر نے دے دی دعا اداسی کی 

امورِ دل میں کسی تیسرے کا دخل نہیں 

یہاں فقط تری چلتی ہے یا اداسی کی 

چراغِ دل کو ذرا احتیاط سے رکھنا 

کہ آج رات چلے گی ہوا اداسی کی 

وہ امتزاج تھا ایسا کہ دنگ تھی ہر آنکھ 

جمالِ یار نے پہنی قبا اداسی کی 

اسی امید پہ آنکھیں برستی رہتی ہیں 

کہ ایک دن تو سنے گا خدا اداسی کی 

شجر نے پوچھا کہ تجھ میں یہ کس کی خوشبو ہے 

ہوائے شامِ الم نے کہا اداسی کی 

دلِ فسردہ کو میں نے تو مار ہی ڈالا 

سو میں تو ٹھیک ہوں اب تو سنا اداسی کی 

بہت دنوں سے میں اس سے نہیں ملا فارسؔ 

کہیں سے خیر خبر لے کے آ اداسی کی 

شاعر:رحمان فارس

(شعری مجموعہ:عشق بخیر؛سالِ اشاعت،2018)

Sukoot-e-Shaam   Mem    Goonji    Sadaa   Udaaasi   Ki

Keh     Hay    Mazeed    Udaasi    Dawaa    Udaaasi   Ki

 

Bahut    Shareer    Tha    Main    Aor    Hansta     Phirta   Tha

Phir    Ik    Faqeer    Nay    Day    Di    Dua    Udaaasi   Ki

 Amoor-e-Dil    Men    Kisi   Teesray   Ka     Dakhl   Nahen

Yahan    Faqat    Tiri    Chalti     Hay   Ya    Udaaasi    Ki

Caraagh-e-Dil    Ko    Zara     Ehtiyaat    Say   Rakhna

Keh    Aaj    Raat    Chalay    Gi    Hawa    Udaaasi   Ki

 Wo    Imtizaj    Tha     Aisa    Keh    Dang    Thi      Har   Aankh

 Jamaal-e-Yaar    Nay    Pehni    Ridaa    Udaaasi   Ki

Isi    Umeed   Pe    Aankhen    Barasti    Rehti   Hen

Keh   Aik    Din     To    Sunay   Ga    Khudaa   Udaaasi    Ki

 Shajar    Nay    Poochha    Keh    Tujh   Men  Yeh     Kaisi    Khushbu    Hay

Hawaa -e-Shaam-e-Alam    Nay      Kahaa    Udaaasi    Ki

 

Dil-e- Fasurd    Ko    Main    Nay    To    Maar   Hi   Daala

So    Main    Theek    Hun     Ab   Tu     Sunaa    Udaaasi    Ki

Bahut    Dino    Say    Main   Usay    Nahen     Mila    FARIS

Kahen   Say   Khair    Khabar    Lay    K    Aa   Udaaasi   Ki

Poet: Rehman    Faris