چکوال انڈسٹریل زون کا قیام عمل میں لائینگے :ایس ایم تنویر
لاہور( لیڈی رپورٹر)صوبائی وزیر صنعت و تجارت و زراعت ایس ایم تنویر نے کہا ہے کہ پنجاب کی صنعتی پالیسی تیاری کے مراحل میں ہے جس کا اعلان جلد کر دیا جائے گا۔نئی صنعتی پالیسی کی بدولت انڈسٹریل سیکٹر انقلابی ترقی و استحکام سے ہمکنار ہوگا صنعتی، تجارتی وکاروباری سرگرمیوں میں خاطر خواہ اضافہ ہوگا۔ایوان صنعت و تجارت کی مشاورت سے چکوال انڈسٹریل زون کا قیام عمل میں لایا جائے گا صوبائی وزیر صنعت و تجارت ایس ایم تنویر نے اس امر کا انکشاف ایوان صنعت و تجارت چکوال کی سالانہ جنرل میٹنگ سے بطور مہمان خصوصی خطاب کرتے ہوئے کیا، صوبائی وزیر پرائمری اینڈ سیکنڈری ہیلتھ کیئر ڈاکٹر جمال ناصر، ڈپٹی کمشنر چکوال اور متعلقہ محکموں کے ضلعی افسران، صنعتکاروں اور تاجروں نے سالانہ میٹنگ میں شرکت کی.ایوان صنعت و تجارت چکوال کے عہدیداروں نے چیمبر کی کارکردگی اور ضلع میں کاروباری سرگرمیوں کے فروغ کیلئے کی جانے والی کاوشوں سے آگاہ کیا، صوبائی وزیر صنعت و تجارت ایس ایم تنویر نے کہا کہ حکومت کے صنعتی ترقی کے لئے کئے گئے اقدامات کے مثبت نتائج برآمد ہو رہے ہیں کہا کہ پوٹھوہار ریجن میں غیر فعال سمال ڈیمز کو ترجیحی بنیادوں پر آپریشنل بنانے کے لئے اقدامات کئے جا رہے ہیں کہا کہ سیاحتی مقامات کو ترقی دے کرسیاحتی سرگرمیوں کے لئے پر کشش اور منافع بخش بنایا جائے گا، کہا کہ صنعتکاروں اور تاجروں کے مسائل کے حل کیلئے پنجاب چیمبرز آف کامرس کوارڈی نیشن کمیٹی بنائی گئی ہے، اضلاع کی سطح پر کام کرنے والے چیمبرز آف کامرس کو اس کمیٹی سے مربوط کر کے صنعتی ترقی کے مقاصد حاصل کئے جائیں گے صوبائی وزیر پرائمری اینڈ سیکنڈری ہیلتھ کیئر ڈاکٹر جمال ناصر نے اپنے خطاب میں کہا کہ چیمبر آف کامرس کی سفارشات کی روشنی میں ضلع کے سرکاری ہسپتالوں خصوصاً ڈی ایچ کیو ہسپتال کی ہیلتھ کیئر سروسز کوبہتر کیا جائے گا۔ صوبائی وزیر صنعت و تجارت ایس ایم تنویر سے اسلام آباد میں راولپنڈی اور اسلام آباد کی بزنس کمیونٹی کے نمائندوں نے بھی ملاقات کی جس میں انڈسٹری اور صنعتکاروں کے مسائل پر بات چیت ہوئی صوبائی وزیر نے صنعتکاروں اور تاجروں کے مسائل ترجیحی بنیادوں پر حل کرنے کی یقین دہانی کرائی.
