شاہدرہ پل صرف 24 گھنٹے میں مرمت، لاہور سے فیصل آباد ٹرین آپریشن بحال
لاہور(سٹی رپورٹر)پاکستان ریلوے لاہور ڈویژن کے انجینئرز نے پلر گرنے کے باعث متاثر ہونے والے شاہدرہ پل کو صرف 24 گھنٹے کی ریکارڈ مدت میں مرمت کر لیا۔ مسلسل ایک دن اور ایک رات ڈیوٹی دے کر لاہور تا فیصل آباد ٹرین آپریشن بحال کرنے پر چیف ایگزیکٹو آفیسر پاکستان ریلوے شاہد عزیز کی ڈی ایس لاہور حنیف گل اور ان کی ٹیم کو شاباش۔ جمعہ کے روز ایروزن کے باعث شاہدرہ کے قریب رہلوے پل کا ایک پلر گر گیا تھا جس سے لاہور تا فیصل آباد ٹریفک معطل ہو کر رہ گئی تھی۔ ماہرین کے ابتدائی اندازے کے مطابق بحالی کے کام میں 72 گھنٹے درکار تھے۔ البتہ چیف ایگزیکٹو پاکستان ریلوے افسر شاہد عزیز نے موقع پر پہنچ کر بحالی کے کام کا فوری آغاز کرایا اور ڈی ایس لاہور کو ٹاسک دیا کہ بحالی 72 گھنٹے سے بھی پہلے کرنے کی کوشش کی جائے۔ڈی ایس حنیف گل کی قیادت میں ریلوے انجینئرز نے صرف 24 گھنٹے میں پل کو مرمت کیا اور آزمائشی بنیادوں پر ٹرین گزارنے اور سیفٹی کے معیار اور تقاضوں کو پورا کرنے کے بعد ٹرین سروس بحال کر دی۔ آپریشن میں شریک عملے کو تعریفی سرٹیفکیٹ بھی جاری کیے گئے۔
سی ای او ریلوے شاہد عزیز نے ڈویژن کی کارکردگی کو سراہتے ہوئے کہا کہ ریلوے انجینئرز اور مستعد عملہ محکمے کا فخر ہیں۔
