عمران خان منصوبے کے تحت ساتھ اسلام آباد آئے،ستمبر میں الیکشن کا کہا گیا:جاوید ہاشمی کے انکشافات
اسلام آباد(نیوزڈیسک)پاکستان تحریک انصاف کے صدر جاوید ہاشمی نے کہا ہے کہ عمران خان ایک منصوبہ کے ساتھ اسلام آباد آئے ہیں۔قومی اسمبلی کے باہر میڈیا سے گفتگو کرتے ہوئے انہوں نے بڑے بڑے انکشافات کرتے ہوئے کہا کہ عمران خان نے کہا، معاملات طے کر لیے، ستمبر میں الیکشن ہوں گے ۔ عمران خان نے سپریم کورٹ کو بدنام کیا،عمران نے کہا کہ پلان کے مطابق جسٹس تصدق حسین ریٹائر ہوجائیں گے اور پھر فلاں جج آجائے گا ،ان کا کہنا تھا کہ عمران خان نے کہا کہ ’وہ‘کہتے ہیں کہ قادری صاحب کے ساتھ چلو۔
جب جاوید ہاشمی سے پوچھا گیا کہ کون سے جج کے بارے میں بتایا گیا تو انہوں نے کہا کہ موجودہ چیف جسٹس کے بارے میں کہا گیا۔عمران خان نے پورا منصوبہ کور کمیٹی کے سامنے رکھالیکن میں نے اختلاف کرتے ہوئے کہا کہ قوم آپ کے ساتھ ہے، نوجوان آپ کے ساتھ ہیں،تحریک انصاف اغواء ہوگئی ہے۔میں نے عمران خان کو کہا کہ آنے والا الیکشن ہمارا ہوگا لیکن اگر ہم شارٹ کٹ پر چلیں گے تو یہ اچھا نہیں ہے۔ہم فوج ،عدلیہ اور اداروں کو خراب کر کے اقتدار لے لیں تو میں ایسے اقتدار کا حصہ نہیں بنوں گا۔
جاوید ہاشمی کا کہنا تھا کہ پارلیمنٹ ،آئین کی بالادستی کےلیے جان دےدوں گا ، پارلیمنٹ کے باہر کھڑاہوں،اندرنہیں جاؤں گا ۔انہوں نے کہا کہ عمران خان کوملک کے آئین کی کوئی پرواہ نہیں ہے، آج بھی پارٹی کا صدر ہوں کیونکہ مجھےعمران خان نے پارٹی سے نکالنے کا آئینی طریقہ استعمال نہیں کیا، ملک میں ووٹ نہیں بندوق کی طاقت کو تسلیم کیا گیا۔ان کا کہناتھا کہ پوری کورکمیٹی نے کہا کہ شیخ رشید سے بچیں۔
جاوید ہاشمی نے الزام لگایا کہ عمران خان کا کہنا تھا کہ فوج کے بغیر نہیں چل سکتے لیکن میں ہر بات پر اعتراض اٹھاتا رہا۔ جب عمران خان سے پوچھا کہ کون سے اشارے آ رہے ہیں تو انہوں نے کندھے پر ہاتھ لگا کر فوج کی طرف اشارہ کیا . کور کمیٹی میں بھی فوج اور آئی ایس آئی کی حمایت حاصل ہونے کا ذکر کیا گیا .ایک سوال کے جواب میں ان کا کہا تھا کہ میاں نواز شریف کی ٹیمیں تھرڈ کلاس ٹیمیں ہیں،انہوں نے قوم کے مسائل حل نہیں کئےاور شہباز شریف پر ایف آئی آر ہو جاتی تو کیا ہوتا، 14 لوگوں کو گولیاں لگ جاناکوئی چھوٹی بات ہے؟
انہوں نے کہا کہ میں کسی کے ساتھ نہیں ہوں،میں کسی صف میں نہیں ہوں اور صرف ان کے ساتھ ہوں جوآئین کی بالادستی کے لئے لڑتے ہیں،عمران خان کا امیج قوم کی نظر میں خراب ہوگیا۔