جون کے بعد عمران خان خود ہی استعفیٰ دیں گے، منظور وسان

جون کے بعد عمران خان خود ہی استعفیٰ دیں گے، منظور وسان

کراچی (اسٹاف رپورٹر)خوابوں اور پیش گوئیوں کے حوالے سے مشہور پاکستان پیپلز پارٹی کے رہنما منظورحسین وسان نے کہاہے کہ جون کے بعد حالات ایسے ہوں گے کہ عمران خان خود ہی استعفیٰ دیں گے۔سوشل میڈیا پر جاری وڈیو میں منظور وسان نے کہاکہ جس طرح حکومت ٹوئیٹر سے چلائی جارہی ہے اس طرح حکومتیں نہیں چلائی جاتیں، عمران خان سے عوام کا اعتماد ختم ہوچکا ہے، عمران خان کو ان کی اپنی پارٹی کی طرف سے الجھن کا شکار کروایا جارہا ہے، پارٹی رہنماؤں کی طرف سے ایسے حالات پیدا کئے جائیں گے جس سے عمران خان کی اہمیت ختم ہوجائے گی۔منظور وسان نے کہا کہ عمران خان کی خیبر پختونخوا اورپنجاب میں پہلے والی پوزیشن ختم ہوتی جارہی ہے، عمران خان کو سوچ سمجھ کر فیصلے کرنے چاہئیں، ایسا نہ ہو کہ مستقبل میں عمران خان کے فیصلے نہ مانے جائیں اور انہیں سیاست سے بھی ہاتھ دھونا پڑے، عمران خان کو لانے والوں کے لیے آگے چل کر پریشانی بڑھ جائے گی، وہ بہت جلد محسوس کریں گہ عمران خان کو لانا ان کی غلطی تھی، عمران خان سے سیاستدانوں کو بدنام کروانے کے بعد ان کی چھٹی کروائی جائے گی۔پیپلز پارٹی رہنما نے کہا کہ 2019 اور 2020 میں عمران خان سے غلط کام کروائے جائیں گے، 2020 عمران خان اور اس کی حکومت کے لیے کڑوا سال ثابت ہوگا، جون کے بعد حالات ایسے ہوں گے کہ عمران خان خود ہی استعفیٰ دیں گے اور ان سے استعفیٰ دلوایا جائے گا، ہوسکتا ہے کہ عمران خان کی جگہ شاہ محمود قریشی کو نیا وزیراعظم لایا جائے۔سابق صوبائی وزیر نے کہا کہ پیپلزپارٹی کے خلاف تحریک انصاف جو باتیں کر رہی ہے وہ سمجھ سے باہر ہے، کہا جارہا ہے کہ آصف علی زرداری اور نواز شریف پیسے دیں گے تو باہر جائیں گے، وزیراعظم کی بات پر ہنسی آرہی ہے، وہ بس ہوا میں فائر کردیتے ہیں۔

مزید : صفحہ اول