پاک بھارت تناؤ کے ذمہ دار مودی،بھارتی وزیر اعظم کی غلط پالیسیوں کی وجہ سے ہندوستان عالمی سطح پر تنہائی کا شکار ہورہا ہے:ملائم سنگھ یادیو

نئی دہلی (مانیٹرنگ ڈیسک)سابق بھارتی وزیر دفاع اور سماج وادی پارٹی کے سربراہ ملائم سنگھ یادیو نے کہا ہے کہ پاکستان اوربھارت کے درمیان تناؤ کے ذمہ دار مودی ہیں، مودی سرکار کی غلط پالیسیوں کی وجہ سے بھارت عالمی سطح پر تنہائی کا شکار ہورہا ہے، بھارت میں عوام کو اتنا پریشان کبھی نہیں دیکھا، پارٹی اجلاس میں کہا ہے کہ مودی سے استعفیٰ کا مطالبہ کرنے جارہے ہیں۔

مزید پڑھیں:پاک بھارت تعلقات میں کشیدگی کا ذمہ دار پاکستان،بھارتی وزیر خزانہ ارون جیٹلی ’’میں نہ مانوں ‘‘ کی روائتی روش اور ہٹ دھرمی پر بضد

بھارتی نجی چینل ’’اے بی پی نیوز ‘‘ کے مطابق ملائم سنگھ یادیو نے کہا ہے کہکرنسی نوٹ بندی کے معاملہ نے سو سے زائد افراد کی جان لے لی ہے، یہ بھارتی عوام کے لئے لمحہ فکریہ ہے ، پارٹی کی جانب سے مودی سرکار کے مستعفی ہونے کا مطالبہ زور پکڑ گیا ہے جس کے بعد اب ہم مودی سے استعفیٰ کا مطالبہ کرنے جارہے ہیں۔انہوں نے کہا کہ پاکستان اور بھارت کے درمیان تناؤ کے ذمہ دار مودی ہیں،ہندوستانی عوام امن چاہتے ہیں، دنگا فساد کے ہم حامی نہیں ہیں، بھارت میں مودی نے وہ کچھ کردیا ہے جس کا تصور ملک کے دشمن بھی نہیں کریں گے۔

ملائم سنگھ یادیو کا کہنا تھا کہ مودی نے جو آگ لگائی ہے اس میں وہ خود جلے گا البتہ ہماری پارٹی نے ملک بھر میں مودی کے خلاف آنے کا فیصلہ کرلیا ہے۔انہوں نے کہا کہ وادی جموں و کشمیر میں مسلسل کرفیو لگا رہنا بھارت کی بدنامی ہے،دہلی اسلام آباد کے رابطے بند نہیں ہونے چاہئیں، رابطے بڑھنے میں فائدہ ہے،بھارت میں مسلمانوں کا مستقبل اچھا ہے ان کے لئے نئی راہیں نکل رہی ہیں، عدلیہ مسلمانوں کے حق میں فیصلے دے رہی ہے۔