وہ 6 علامات جو خطرناک کینسر کا پیش خیمہ ہوسکتی ہیں
لندن(مانیٹرنگ ڈیسک) کینسر زیادہ تر کیسز میں خاموش قاتل ثابت ہوتا ہے کیونکہ لوگوں کی باقاعدگی سے چیک اپ نہ کرانے کی عادت کے باعث اس کی تشخیص اس وقت ہو پاتی ہے جب یہ قابو سے باہر ہو چکا ہوتا ہے۔ اب ماہرین نے چھ ایسی علامات بتا دی ہیں جو خطرناک قسم کے کینسر کا پیش خیمہ ہو سکتی ہیں تاہم یہ ایسی علامات ہیں کہ کسی نے سوچا بھی نہ ہو گا کہ ان کا کینسر سے بھی کوئی تعلق ہو سکتا ہے۔
دی سن کے مطابق برطانوی محکمہ صحت کے ماہرین کی طرف سے بتائی گئی یہ چھ علامات مسلسل کھانسی، سینے کی انفیکشن، سانس لیتے یا کھانستے ہوئے تکلیف ہونا،انگلیوں کی ہیئت یا شکل میں تبدیلی آنا، چہرے پر سوجن آنا اور ہارمونز میں بگاڑ آنے کی وجہ سے ظاہر ہونے والی کچھ علامات شامل ہیں۔ ہارمونز کے بگاڑسے انسان کی بھوک ختم ہو جانا، وزن کم ہونا شروع ہو جانا، سوجن، آواز میں تبدیلی آنا وغیرہ جیسی علامات ظاہر ہوتی ہیں۔
ماہرین کا کہنا ہے کہ یہ تمام علامات لازمی طور پر کینسر کی علامات نہیں ہیں۔ ان کا سبب کوئی اور عارضہ بھی ہوسکتا ہے تاہم یہ مختلف اقسام کے کینسر کی علامات بھی ہو سکتی ہیں۔لہٰذا ان علامات کے ظاہر ہونے کی صورت میں چیک اپ لازمی کروانا چاہیے۔