جنوں کے ہاتھ میں ہے ایٹمی بموں کی کلید۔۔۔
حنا کا رنگ لہو سا لباس یا اللہ
عجیب وہم ، عجب التباس یا اللہ
وفا کا اور بتا میں ثبوت کیا دیتا
بجھا کے خون سے دھرتی کی پیاس یااللہ
ترے خیال سے ہجرت ترے وصال کی آس
کتاب دل کا کٹھن اقتباس یا اللہ
مجھے دیا تو ہے تاریک راستوں کا سفر
عطا ہو دل بھی قیافہ شناس یا اللہ
نہ کوئی جھیل، نہ ندی ، نہ اوس کی بوندیں
جلا نہ دے کہیں صحرا کی پیاس یا اللہ
وہ پہلی پہلی سی بارش وہ اپنا کچا گھر
وہ سوندھی سوندھی سی مٹی کی باس یااللہ
اسے بھی کاش ! محبت کی بد دعا دے جائے
فقیر کوئی دریدہ لباس یا اللہ
جنوں کے ہاتھ میں ہے ایٹمی بموں کی کلید
فلک اداس ، زمیں بد حواس یا اللہ
گناہ گار ہے بزمی کا بے لباس بدن
مگر رہے تری رحمت کا پاس یا اللہ
کلام :سرفراز بزمی (سوائی مادھوپور ،راجستھان، انڈیا )
