بھارتی ہدایتکار انوراگ کشپ نے اداکارسشانت سنگھ راجپوت سے متعلق نیا انکشاف کردیا
ممبئی(ویب ڈیسک)آنجہانی بھارتی اداکار سشانت سنگھ راجپوت سے متعلق بھارتی ہدایتکار انوراگ کشپ نے انکشاف کیا ہے کہ "انہوں نے موت سے قبل مجھ سے رابطے کی کوشش کی تھی"۔
این ڈی ٹی وی نیوز کے مطابق انوراگ کشپ نے اپنے حالیہ انٹرویو میں سشانت سنگھ راجپوت کے بارے میں بات کرتے ہوئے کہا کہ "سشانت سنگھ راجپوت نے موت سے تین ہفتے قبل اپنے مینجر اُدے سنگھ گوری کے ذریعے مجھ سےرابطہ کرنے کی کوشش کی تھی"۔ انہوں نے بتایا کہ "دراصل بہت عرصہ پہلے سشانت سنگھ راجپوت نے مجھ سے رابطہ بالکل منقطع کردیا تھا اور میں یہ فیصلہ کرچکا تھا کہ انڈسٹری کے بڑے ناموں کے ساتھ کام نہیں کروں گا اور میں اب دوبارہ کسی برے تجربےسے نہیں گزروں گا"۔لیکن جب تین ہفتے کے بعد مجھے یہ خبر ملی کہ اداکار کی موت ہوگئی ہے تو مجھے بہت برا محسوس ہوا اور میں یہ سوچنے لگا کہ جب سشانت نے مجھ سے رابطہ کرنے کی کوشش کی تو میں نے بات کیوں نہیں کی۔ میں یہ سوچ رہا تھا کہ ہوسکتا ہے کہ اگر میں اس وقت بات کرلیتا تو صورتحال مختلف ہوتی۔ اس ایک واقعہ کے بعد میں نے ان تمام لوگوں سے بات کرنا شروع کردیا جن سے میں کئی سالوں سے رابطے میں نہیں تھا"۔
واضح رہے کہ تحقیقات کرنے والے سینٹرل بیورو آف انویسٹی گیشن (سی بی آئی) نے 2020 ء میں ہونے والی سُشانت سنگھ راجپوت کی موت کو تحقیقات کے بعد اس کو خودکشی قرار دے دیا تھا۔لیکن گزشتہ سال اداکار کے پوسٹ مارٹم کے ایک عینی شاہد روپ کمار شاہ نے بتایا کہ "جب میں نے پہلی بار سشانت سنگھ کی لاش دیکھی تو میں نے اپنے سینئرز سےکہا کہ مجھے لگتا ہے کہ یہ خودکشی نہیں قتل کا معاملہ ہے"۔روپ کمار شاہ نے بتایا کہ "میں نے ان سے یہاں تک کہا کہ ہمیں اصولوں کے مطابق کام کرنا چاہیے لیکن میرے سینئرز نے مجھے روک دیا اور کہا کہ صرف لاش کی تصاویر لے لو اور جلد از جلد اسے پولیس کے حوالے کر دو"۔
