آسٹریا کا 4 روسی سفارت کاروں کو ملک بدر کرنے کا اعلان
ویانا (ڈیلی پاکستان آن لائن) آسٹریا چار روسی سفارت کاروں کو بین الاقوامی معاہدوں کی خلاف ورزی پر ملک بدر کر رہا ہے، آسٹریا کی وزارت خارجہ نے جمعرات کو اس کی تفصیلات نہیں بتائیں تاہم جو حوالہ دیا گیا ہے وہ اکثر جاسوسی کے معاملات میں استعمال ہوتا ہے۔
وزارت نے بتایا کہ چار سفارت کاروں میں سے دو کو ناپسندیدہ شخصیات قرار دیا گیا ہے اور انہیں 8 فروری تک ملک چھوڑنے کا حکم دیا گیا ہے۔ یہ آسٹریا میں روسی سفارت خانے میں تعینات ہیں، جبکہ دیگر دو ویانا میں اقوام متحدہ میں روسی مشن میں کام کر رہے ہیں۔
خبر ایجنسی روئٹرز کے مطابق وزارت خارجہ نے کہا 'روسی سفارت خانے کے دو سفارت کاروں نے اپنی سفارتی حیثیت سے متصادم طریقے سے کام کیا ہے۔ اس لیے انہیں سفارتی تعلقات سے متعلق ویانا کنونشن کے آرٹیکل 9 کے مطابق ناپسندیدہ افراد قرار دیا گیا ہے۔' اس نے مزید کہا کہ اقوام متحدہ میں روسی مشن میں کام کرنے والے دونوں افراد نے اس طرح کام کیا جو اقوام متحدہ اور آسٹریا کے درمیان میزبان ملک کے معاہدے سے مطابقت نہیں رکھتا تھا۔ وزارت خارجہ نے واضح طور پر یہ نہیں بتایا کہ کس سفارت کار نے کیا کیا ہے۔
