سپریم کورٹ میں موسم سرما کی تعطیلات ختم، عدالتی ہفتہ کے دوران اہم مقدمات کی سماعت کے لیے بینچ تشکیل
اسلام آباد(یوا ین پی)سپریم کورٹ میں موسم سرما کی تعطیلات کے اختتام پر شروع ہونے والے عدالتی ہفتہ کے دوران اہم مقدمات کی سماعت کے لیے بینچ تشکیل دے دیئے گئے ہیںجو کل (سوموار)سے مقدمات کی سماعت کا آغاز کریں گے ۔ رواں ہفتہ متعدد انتخابی عزرداریوں سمیت ای او بی آئی کرپشن کیس ، لال مسجد آپریشن میں ماورائے عدالت قتل کا مقدمہ کی سماعت ہوگی ۔عدالت کا پہلا بینچ چیف جسٹس انور ظہیر جمالی کی سربراہی میں جسٹس عمر عطا بندیال اور جسٹس خلجی عارف حسین پر مشتمل ہے ۔ عدالت کا دوسرا بینچ جسٹس میاں ثاقب نثار ، جسٹس فیصل عرب ، جسٹس طارق پرویز پر مشتمل ہے ۔ تیسرے بینچ کے اراکین میں جسٹس آصف سعید خان کھوسہ ، جسٹس مشیر عالم اور جسٹس سردار طارق مسعود شامل ہیں ۔ عدالت عظمیٰ کا چوتھا ڈویژن بینچ جسٹس اعجاز افضل خان اور جسٹس اقبال حمیدالرحمان پر مشتمل ہے ۔ جسٹس گلزار احمد اور جسٹس دوست محمد خان پانچویں بینچ کے ممبران ہیں جبکہ عدالت عظمیٰ کا چھٹا بینچ جسٹس قاضی فائز عیسی اور جسٹس مقبول باقر پر مشتمل ہے ۔ یہ تمام بینچ اسلام آباد میں مقدمات کی سماعت کریں گے ۔ عدالت کا ساتواں بینچ سپریم کورٹ لاہور رجسٹری میں مقدمات کی سماعت کرے گا۔ یہ بینچ جسٹس شیخ عظمت سعید اور جسٹس منظور احمد ملک پر مشتمل ہے ۔
