بھارتی کرکٹر ہاردک پانڈیا نے غیر ملکی اداکارہ سے منگنی کر لی

دبئی(مانیٹرنگ ڈیسک)بھارتی کرکٹر ہاردک پانڈیا نے دبئی میں غیرملکی اداکارہ کے ساتھ منگنی کر لی۔ گلف نیوز کے مطابق 27سالہ نتاشا ستانکووک (Natasa Stankovic)سربیا کی معروف اداکارہ ہیں جو بالی ووڈ میں بھی کام کر چکی ہیں۔وہ سربیا میں تو کافی معروف تھیں لیکن سربیا سے باہر اس وقت شہرت پائی جب انہوں نے بگ باس 8میں شرکت کی۔ پھر انہوں نے عمران ہاشمی اور رشی کپور کی فلم ’دی باڈی‘ میں ایک گانے میں پرفارم کیا تھا۔ اس کے علاوہ وہ اپنے سابق بوائے فرینڈ ایلی گونی کے ہمراہ ’نچ بلیے‘ میں بھی شریک ہوئی تھیں اور فائنل تک پہنچی تھیں۔
ہاردک اور نتاشا کی منگنی دبئی میں ہی ہوئی اور منگنی کے تقریب میں ان کے قریبی دوست احباب نے شرکت کی۔ منگنی کے بعد وہ دوستوں کے ہمراہ کشتی رانی کرنے بھی گئے۔ 26سالہ ہاردک پانڈیا نے اپنے انسٹاگرام اکاﺅنٹ پر اپنی اور نتاشا کی تصاویر پوسٹ کی ہیں جن میں انہوں نے منگنی کی خوشی مناتے دیکھا جا سکتا ہے۔ ایک تصویر میں نتاشا اپنی منگنی کی انگوٹھی دکھا رہی ہوتی ہیں۔ اس پوسٹ کے کیپشن میں ہاردک نے لکھا کہ ”میں تیرا، تو میری ، جانے سارا ہندوستان۔“کیپشن میں انہوں نے انگیجڈ (Engaged)کے ہیش ٹیگ کے ساتھ منگنی کی تاریخ یکم جنوری 2020ءبھی لکھی۔