الیکشن کمشن؛فاٹا میں 25 جولائی کو صوبائی اسمبلیوں کے الیکشن کرانیکی نظر ثانی درخواست مسترد

اسلام آباد(ڈیلی پاکستان آن لائن) الیکشن کمیشن نے فاٹا میں صوبائی اسمبلیوں کے انتخابات الیکشن 2018 کےساتھ کرانے کی درخواست مسترد کردی۔
چیف الیکشن کمشنر کی سربراہی میں الیکشن کمیشن کے پانچ رکنی بنچ نے متحدہ قبائل پارٹی کی فاٹا میں بھی 25 جولائی کو صوبائی اسمبلیوں کے انتخابات کرانے کی نظر ثانی درخواست پر سماعت کی۔
تین درخواست گزاروں کی طرف سے بیرسٹر فروغ نسیم الیکشن کمیشن میں پیش ہوئے اور اپنے دلائل میں مو¿قف اپنایا کہ فاٹا میں صوبائی انتخابات سے متعلق حلقہ بندیوں کےلئے دو ماہ چاہئیں، عام انتخابات میں اگر تاخیر ہوتی ہے تو کوئی حرج نہیں۔
الیکشن کمیشن نے دلائل مکمل ہونے کے بعد فیصلہ محفوظ کیا جو کچھ دیر بعد سناتے متحدہ قبائل پارٹی کی درخواست مسترد کردی۔
اس کے علاوہ الیکشن کمیشن نے جھوٹی درخواستوں پر بھی فیصلہ سنایا کہ سینیٹر ہدیت اللہ، بریگیڈیئر (ر) قیام اور عدنان خان کے نام پر جھوٹی درخواستیں دائر ہوئیں، جھوٹی درخواستیں دائر کرنے والوں کےخلاف درخواست گزار مقدمہ درج کرائیں اور ڈی جی لاءبھی الیکشن کمیشن کی جانب سے شکایت درج کرائیں۔
واضح رہے کہ متحدہ قبائل پارٹی نے عام انتخابات کے ساتھ فاٹا میں صوبائی اسمبلیوں کے انتخابات کرانے کے لیے اسلام آباد میں بھی دھرنا دیا۔