سکاٹ لینڈ سے شکست کے بعد ویسٹ انڈیز ورلڈ کپ سے باہر

 
 لاہور(سپورٹس ڈیسک )ورلڈ کپ کوالیفائر سپر سکس میں اسکاٹ لینڈ نے ویسٹ انڈیز کو 7 وکٹوں سے شکست دے دی جس کے ساتھ ہی ویسٹ انڈیز ورلڈ کپ کیلئے کوالیفائی کرنے میں ناکام ہوگئی۔ کوالیفائرز کے گروپ میچز میں زمبابوے اور نیدرلینڈز کے ہاتھوں شکست کے بعد ویسٹ انڈیز کی ٹیم سپر سکس مرحلے کے میچ میں اسکاٹ لینڈ سے بھی ہار گئی۔ ورلڈ کپ کوالیفائر سپر سکس میں اسکاٹ لینڈ نے ٹاس جیت کر ویسٹ انڈیز کو بیٹنگ کی دعوت دی۔ ویسٹ انڈیز کی ٹیم 181 رنز پر ڈھیر ہوگئی، جیسن ہولڈر 45 رنز بناکر ٹاپ اسکورر رہے، روماریو شیفرڈ نے 36 رنز بنائے۔ اسکاٹ لینڈ کے برینڈون مک مولن نے تین کھلاڑیوں کو آﺅٹ کیا۔ویسٹ انڈیز کے 182 رنزکا ہدف اسکاٹ لینڈ نے 44 ویں اوورز میں 3 وکٹوں کے نقصان پر بآسانی حاصل کرلیا اور 7 وکٹوں سے شکست دی۔اسکاٹ لینڈ کے میتھیو کراس نے 74 رنزکی ناقابل شکست اننگزکھیلی جبکہ برینڈن میک کلم نے 69 رنز بنائے۔اس شکست کے ساتھ ہی دو مرتبہ کا عالمی چیمپئن ویسٹ انڈیز پہلی بار ورلڈ کپ کیلئے کوالیفائی نہ کرسکا۔یہ ورلڈ کپ کوالیفائرز میں ویسٹ انڈیز کی مسلسل تیسری شکست تھی جس کے بعد وہ پہلی مرتبہ ورلڈ کپ کیلئے کوالیفائی کرنے میں ناکام ہوگئی۔ویسٹ انڈیز کرکٹ ٹیم کے کپتان نے سکاٹ لینڈ سے شکست پر افسردگی کا اظہار کرتے ہوئے کہا کہ محنت سے کھیل پیش کرنے کی کوشش کی لیکن قسمت نے ساتھ نہیں دیا۔