نواز شریف کا پاکستان آنا یا نہ آنا صحت پر نہیں، سیاست اور کیس کے فیصلے پر منحصر ہے: شیخ رشید
راولپنڈی (ڈیلی پاکستان آن لائن) سربراہ عوامی مسلم لیگ شیخ رشید نے کہا ہے کہ نواز شریف کا پاکستان آنا یا نہ آنا صحت پر نہیں سیاست اور کیس کے فیصلےپر منحصر ہے۔ ملک سے مڈل کلاس ختم ہو گئی ہے۔
سماجی رابطے کی ویب سائٹ ٹویٹر پر سابق وفاقی وزیر داخلہ شیخ رشید کا کہنا تھا کہ مفتاع اسماعیل اور اسحاق ڈار کے آئی ایم ایف فیصلوں میں رشتے داری کے علاوہ کیا فرق ہے۔ اسحاق ڈار نے پہلےآنکھیں دکھائیں پھر پاؤں پڑے، 10 مہینے ضائع کیے اور 9 مہینے کے لیے ناک رگڑ کر تمام شرائط مان کر سٹینڈ بائے معاہدہ کیا۔
انہوں نے کہا کہ 12جولائی سے بجلی سمیت مہنگائی کی نئی لہر آنے والی ہے اور حکومت کی الٹی گنتی شروع ہونے والی ہے۔ موجودہ حکومت نگران حکومت اور آنے والی حکومت 3 حکومتوں نے9 مہنیوں میں آئی ایم ایف کی سخت شرائط پوری کرنی ہیں، 6 ماہ میں 11 ارب ڈالر واپس کرنے ہیں دوست ممالک کی ڈیپازٹ یقین دہانیوں کابھی جلد پتا چل جائے گا۔
شیخ رشید نے زید کہا کہ آئی ایم ایف معاہدے میں غلطی کی گنجائش نہیں، اب یا کبھی نہیں کا ماحول پیدا ہو گیا ہے۔ ملک میں مڈل کلاس ختم ہو گئی، موجودہ حکومت نے اتنی فضول خرچیاں کی ہیں کہ لینے کے دینے پڑ جائیں گے۔ پی پی پی کےوزیر خارجہ بلاول بھٹو نے 50 سے زیادہ غیر ملکی بیکار سیروسیاحت کے دورے کیے لیکن آئی ایم ایف کے معاہدے پر خاموش تماشائی ہے۔
نواز شریف سے متعلق شیخ رشید نے کہا کہ ان کا آنا یا نہ آنا صحت پر نہیں سیاست اور کیس کے فیصلےپر منحصر ہے۔ 13 پارٹیوں کا سیاسی دیوالیہ اور قوم کا معاشی دیوالیہ ہو گیا ہے۔ 10 ماہ ضائع کیے گئے، آخری روز معاہدہ کیا گیا۔ ابھی آگے آگے دیکھیے 12 اگست تک کیا ہوتا ہے۔ روس کے سستے تیل پہنچنے کی دیر ہے کہ ڈیزل 7.50روپے مہنگا ہو گیا ہے۔
