’عدنان سمیع بھارت میں ہمارا خفیہ ایجنٹ ہے‘ پاکستانیوں نے مہم شروع کردی، عدنان سمیع کو شدید پریشان کردیا

’عدنان سمیع بھارت میں ہمارا خفیہ ایجنٹ ہے‘ پاکستانیوں نے مہم شروع کردی، ...
’عدنان سمیع بھارت میں ہمارا خفیہ ایجنٹ ہے‘ پاکستانیوں نے مہم شروع کردی، عدنان سمیع کو شدید پریشان کردیا

  


لاہور(مانیٹرنگ ڈیسک) گلوکار عدنان سمیع کو جب سے بھارتی شہریت ملی ہے وہ اپنے نئے وطن سے ’محبت‘ جتلانے کا کوئی موقع ہاتھ سے نہیں جانے دیتے اور پھر جواب میں پاکستانی سوشل میڈیا صارفین بھی ان پر پھبتیاں کسنے میں کوئی کسر اٹھا نہیں رکھتے، تاہم اب پاکستانیوں نے ان کے خلاف ایسی مہم شروع کر دی ہے کہ ان کی پریشانی کی کوئی انتہاءنہ ہو گی۔ اس مہم میں پاکستانی عدنان سمیع کو پاکستان کا خفیہ ایجنٹ قرار دینے پر تلے ہیں جو بھارت میں پاکستان کے لیے کام کر رہا ہے۔ سماجی رابطے کی ویب سائٹ ٹوئٹر پر جاری اس مہم میں صحافی مبشر لقمان سمیت کئی معروف شخصیات بھی شامل ہو گئی ہیں۔ مبشر لقمان نے ایک ٹویٹ میں لکھا ہے کہ ”یہ دیکھ کر بہت افسوس ہوتا ہے کہ کس طرح کچھ اوباش ہمارے عظیم خفیہ ایجنٹ عدنان سمیع کے لیے مشکلات پیدا کر رہے ہیں۔ اب تک وہ ہمارا پرفیکٹ جاسوس رہا ہے لیکن اب اس کی حقیقت کھلنی شروع ہو گئی ہے۔“ایک اور ٹویٹ میں مبشر لقمان نے لکھا کہ ” میری تمام دوستوں سے اپیل ہے کہ عدنان سمیع کو ایکسپوز نہ کریں۔ وہ ہمارے لیے انتہائی کٹھن حالات میں کام کر رہا ہے، اس کے وزن میں بھی درجنوں کلوگرام کمی ہو چکی ہے کیونکہ وہاں وہ صرف سبزیاں کھانے پر مجبور ہو چکا ہے۔ ایک زمانے میں جو آدمی بہت بڑی بھینس ہوا کرتا تھا، اس نے کتنی بڑی قربانی دی ہے۔“

ڈاکٹر فرحان ورک نے اپنے ایک ٹویٹ میں لکھا کہ ”میں نے پاکستانیوں کو بہت روکا کہ ہمیں بھارتیوں کو نہیں بتایا چاہیے کہ عدنان سمیع خان کی والدہ کا تعلق مقبوضہ کشمیر سے ہے، اس کا باپ ایک ریٹائرڈ پاکستانی آرمی آفیسر ہے اور وہ خود آئی ایس آئی کے خالصتان ڈیسک پر کام کر رہا ہے لیکن کسی پاکستانی نے میری بات نہیں سنی۔“بینش ملک نے لکھا کہ ”عدنان سمیع کے خاندان کی تفصیل کی تو کوئی بات نہ تھی لیکن کسی پاکستانی نے اس کی انتہائی خفیہ ادارہ جاتی تفصیلات بھی افشا کر دی ہیں کہ پاک فوج میں میجر رینک پر ہے، اس نے 1989ءسے پاک فوج جوائن کی اور اب آئی ایس آئی میں ہے اور اسے اس کی خدمات کے صلے میں نشان حیدر بھی دیا جا چکا ہے۔ یہ باتیں سامنے آنے کے بعد خدا کرے وہ بھارت میں محفوظ رہے۔ وہ ہمارا بہت بڑا اثاثہ ہے۔“

سعد بن طارق نامی نوجوان نے لکھا کہ ”میرے خیال میں ہمیں اپنے ہیرو کو ایسے رسوا نہیں کرنا چاہیے۔ ابھی اس کا مشن مکمل نہیں ہوا۔“شعیب نے لکھا کہ ”پاکستانیوں نے جو کہنا ہے کہہ لیں لیکن عدنان سمیع کو اپنی ٹویٹس میں ٹیگ تو نہ کریں۔ آخر وہ خفیہ مشن پر ہے۔“حجاب شاہ نے کہا کہ ”میں آپ سے درخواست کرتی ہوں کہ عدنان سمیع کی تفصیلات افشا نہ کرو۔ ہمارا آئی ایس آئی ایجنٹ بہترین طریقے سے اپنا کام کر رہا ہے۔ “ میاں ادریس نامی نوجوان نے عدنان سمیع کو پاکستانی ایجنٹ ثابت کرنے پر تلے تمام لوگوں سے مخاطب ہوتے ہوئے لکھا کہ ”تسی چھتر پوا کے چھڈو گے عدنان سمیع کو۔ (تم لوگ عدنان سمیع کو جوتے پڑوا کے رہو گے۔)“

مزید : ڈیلی بائیٹس /علاقائی /پنجاب