حکومت سندھ تعلیم کے فروغ کیلئے تعاون کررہی ہے، اکرام اللہ دھاریجو

حکومت سندھ تعلیم کے فروغ کیلئے تعاون کررہی ہے، اکرام اللہ دھاریجو

  



کراچی (اسٹاف رپورٹر)صوبائی وزیر برائے صنعت و تجارت اور امداد باہمی و انسداد بدعنوانی جام اکرام اللہ دھاریجو نے کہا کہ ملک و قوم کی ترقی میں تعلیم انتہائی اہم کردار ادا کرتی ہے جبکہ طلبا کی کردار سازی میں اساتذہ، والدین اور ادارے نہایت اہم کردار ادا کرتے ہیں۔ جن قوموں کو اچھے اور قابل اساتذہ میسر آتے ہیں وہ انتہائی خوش نصیب ہوتی ہیں۔ یہ بات انہوں نے کیڈیٹ کالج گھوٹکی میں چوتھے تقریب یوم والدین کے انعقاد کے موقع پر بحیثیت مہمان خصوصی خطاب کرتے ہوئے کہی۔ تقریب میں طلبا کے والدین، سیاسی وسماجی شخصیات کے علاوہ سول و فوجی افسران بھی بڑی تعداد میں موجود تھے۔ صوبائی وزیر جام اکرام اللہ دھاریجو نے کیڈٹ کالج کے طلبا کی پریڈ کا بھی معائنہ کیا۔ تقریب میں پریڈ، پی ٹی شو، جمناسٹک اور دیگر جسمانی کرتبوں کا مظاہرہ کیا گیا۔ تقریب میں چاروں صوبوں کی ثقافت کو بھی شاندار انداز سے اجاگر کیا گیا۔ پروگرام میں بورڈ اور کالج میں نمایاں پوزیشن اور بہتر کارکردگی کا مظاہرہ کرنے والے کیڈٹ اور اساتذہ و دیگر عملے میں یادگاری شیلڈز اور تعریفی اسناد بھی تقسیم کی گئیں۔ تقریب سے خطاب کرتے ہوئے صوبائی وزیر برائے صنعت و تجارت اور امداد باہمی و انسداد بدعنوانی جام اکرام اللہ دھاریجو نے کیڈٹ کالج کے پرنسپل، اساتذہ کرام، ملازمین اور مستقبل کے معمار کیڈٹس کو چوتھے یوم والدین کے پرمسرت موقع پر مبارکباد پیش کرتے ہوئے کہا کہ آج کا دن ایک یادگار اور سنہری دن ہے۔ دس سال کے قلیل عرصے میں اس کالج کی کارکردگی قابل تعریف اور پرنسپل اساتذہ کی محنت کا نتیجہ ہے۔ جام اکرام اللہ دھاریجو نے مزید کہا کہ اساتذہ اور تمام عملہ مبارکباد کا مستحق ہے۔ اس ادارے نے اپنی ذمہ داری کا بھرپور مظاہرہ کرتے ہوئے علمی میدان میں خدمات تسلسل کے ساتھ جاری رکھی ہے۔ انہوں نے کہا کہ یہ بات قابل فخر ہے کہ یہ ادارہ چند بہترین اداروں کی صف اول میں ہے۔ جام اکرام اللہ دھاریجونے کہا کہ مجھے امید ہے کہ یہ مستقبل کے معمار اپنی فیلڈز میں بہت اہم کردار ادا کرینگے۔ 

مزید : صفحہ آخر