کراچی: فیڈرل بی ایریا میں پولیس موبائل پر حملے کا مقدمہ درج
کراچی (اسٹاف رپورٹر) فیڈرل بی ایریا میں پولیس موبائل پر حملے کا مقدمہ درج کرلیا گیا، ملزمان کی فائرنگ سے کانسٹیبل عامراور دو راہگیر زخمی ہوئے تھے۔تفصیلات کے مطابق کراچی کے علاقے ایف بی ایریا بلاک22میں پولیس موبائل پر مسلح ملزمان کے حملے کا مقدمہ ایف بی ایریا تھانے میں نامعلوم دہشت گردوں کیخلاف درج کرلیا گیا۔مقدمہ دہشت گردی اور اقدام قتل کی دفعات کے تحت درج کیا گیا، جس میں کہا گیا کہ سرکاری موبائل بلاک 22 میں انسدادپولیو مہم میں مصروف تھی، اسی دوران بینک پٹی چیک کرنے کے لیے گشت نکلا کہ اچانک سے 3 موٹرسائیکل سوار 5 ملزمان سامنے آگئے۔مقدمے کے متن میں کہا کہ ملزمان پینٹ شرٹ اور کوٹ میں ملبوس تھے، ملزمان نے جان سے مارنے کی نیت سے موبائل پر فائرنگ کی، اندھا دھند فائرنگ کے دوران ڈرائیور موبائل کچھ فاصلے پرلے گیا۔ایف آئی آر کے مطابق ملزمان نے پیچھے سے موبائل پر مزید فائرنگ کئے، فائرنگ سے موبائل میں پیچھے بیٹھا کانسٹیبل عامر شدیدزخمی ہوا، دہشت گرد اسی دوران فائرنگ کرتے ہوئے فرار ہوگئے۔متن میں کہا گیا کہ ملزمان کی فائرنگ سے 2 راہگیر بھی زخمی ہوئے، زخمی سپاہی کو آغاخان راہ گیروں کو عباسی اسپتال منتقل کیا گیا۔