وزیر اعظم عمران خان نے پیٹرول، ڈیزل، بجلی سستی کرنے کی وجہ بتادی

وزیر اعظم عمران خان نے پیٹرول، ڈیزل، بجلی سستی کرنے کی وجہ بتادی
وزیر اعظم عمران خان نے پیٹرول، ڈیزل، بجلی سستی کرنے کی وجہ بتادی
سورس: Instagram/imrankhan.pti

  

اسلام آباد (ویب ڈیسک) وزیراعظم عمران خان نے ملک میں پیٹرول، ڈیزل اور بجلی کی قیمتوں میں کمی کرنے کی وجہ بتاتے ہوئے کہا کہ ہمارے پاس پیسہ زیادہ آیا ہے، اس لیے قیمتوں میں کمی کے قابل ہوئے ہیں۔انہوں نے بتایا کہ اپنا گھر بنانے کے لیے 20 لاکھ روپےکا قرض بغیر سود کے دے رہے ہیں، ہمارا مقصد ہےکہ لوگ اپنے پاؤں پر کھڑے ہوں، گھربنانےکے لیے 55 ارب روپے کے قرض دیے گئے ہیں۔

روزنامہ جنگ کے مطابق کامیاب پاکستان پروگرام کے تحت بلاسود قرضوں کے اجراء کی تقریب سے خطاب کرتے ہوئے وزیراعظم عمران خان نے کہا کہ ایف بی آر نے فروری کا طے شدہ441 ارب روپے کا ہدف عبور کرلیا، ٹیکس وصولیوں میں 28 فیصد اضافہ ہوا ہے،  ایف بی آر کو ریکارڈ ٹیکس اکھٹا کرنے پر خراج تحسین پیش کرتا ہوں۔

انہوں نے کہا کہ پاکستان میں ریکارڈ ٹیکس اکٹھا کیا گیا،ہمارے پاس پیسے زیادہ آئے، بجلی کا فی یونٹ 5 روپے، پیٹرول اورڈیزل 10 روپے فی لیٹر کم کیا، قوم سے کہتا ہوں ٹیکس دیں وہ پیسہ نچلی سطح تک لگاؤں گا،  بلاسود قرضوں کے پروگرام کے تحت دو سال میں407 ارب روپے کے قرضے کم لاگت گھروں کی تعمیر، کاروبار شروع کرنے کیلئے دیئے جائیں گے۔

عمران خان کا کہنا تھا کہ پاکستان ایک بڑے خواب کا نام تھا، ہمیں مثالی اسلامی فلاحی ریاست بننا تھا، یہ افسوس ناک ہے کہ 1947 ء میں جو ہمارا قبلہ ہونا چاہیے تھا ہم اس پر نہیں چل سکے، ملک جس نظریہ پر بنا تھا اس پر ہم نہیں چل سکے، جوانسان اپنے نظریہ سے ہٹتا ہے وہ بھٹک جاتا ہے۔

وزیراعظم نے کہا کہ ریاست کو اپنے کمزور طبقےکی ذمہ داری لینی تھی، ہیلتھ کارڈ پر فخر ہے، مارچ کے آخر تک پنجاب کے تمام خاندانوں کے پاس ہیلتھ کارڈ آجائے گا، ہیلتھ کارڈ کے ذریعے اچھے سے اچھے ہسپتال جا کر علاج کرایا جاسکتا ہے،ساڑھے تین سال میں سب سے زیادہ خوشی اس بات کی ہے کہ لوگوں کے پاس ہیلتھ کارڈ ہوگا۔

مزید :

علاقائی -اسلام آباد -