مینز جونیئر ہاکی ورلڈ کپ رواں سال 8 دسمبر سے شروع ہو گا
نئی دہلی(این این آئی) گیارہواں مینز جونیئر ہاکی ورلڈ کپ رواں برس 8 سے 18 دسمبر تک بھارت میں کھیلا جائے گا جس میں جرمنی کی ٹیم ٹائٹل کا دفاع کرے گی ٗ پاکستانی ٹیم 9 دسمبر کو ہالینڈ کے خلاف میچ سے مہم کا آغاز کرے گی۔ انٹرنیشنل ہاکی فیڈریشن (ایف آئی ایچ) کی طرف سے جاری کردہ بیان کے مطابق 11 روز تک جاری رہنے والے ایونٹ میں 16 ممالک کی ٹیمیں عالمی ٹائٹل کے حصول کیلئے ایکشن میں دکھائی دیں گی، ان ٹیموں کو چار گروپس میں تقسیم کیا گیا ہے، گروپ اے میں ارجنٹائن، آسٹریلیا، آسٹریا اور کوریا، گروپ بی میں پاکستان، ہالینڈ، بلجیم اور مصر، گروپ سی میں دفاعی چمپئن جرمنی، جاپان، نیوزی لینڈ اور سپین ٗ گروپ ڈی میں کینیڈا، انگلینڈ، بھارت اور جنوبی افریقہ شامل ہیں، پاکستانی ٹیم 9 دسمبر کو ابتدائی میچ میں ہالینڈ کے مدمقابل ہو گی، گرین شرٹس دوسرا میچ 11 دسمبر کو مصر جبکہ تیسرا اور آخری میچ 12 دسمبر کو بلجیم کے خلاف کھیلے گی۔
12 دسمبر تک گروپ میچز کھیلے جائیں گے، 13 دسمبر کو آرام کا دن ہو گا جس کے بعد 14 دسمبر سے کلاسیفکیشن میچز شروع ہوں گے، میگا ایونٹ کے سیمی فائنلز 16 دسمبر کو کھیلے جائیں گے ٗ دو ٹاپ ٹیموں کے درمیان فائنل 18 دسمبر کو کھیلا جائے گا۔
