پنجاب اسمبلی کوبجلی فراہم کرنے کے منصوبہ کی تارچورلے اڑے

پنجاب اسمبلی کوبجلی فراہم کرنے کے منصوبہ کی تارچورلے اڑے

لاہور(وقائع نگار)لیسکو میکلوروڈ گرڈ سٹیشن سے پنجاب اسمبلی کو بجلی فراہم کرنے کا منصوبہ چوروں کی نذر ہو گیا۔لاکھوں روپے مالیت کی کیبل چوری ، افسروں ا و رملازمین نے ملی بھگت سے ہزاروں روپے لاگت کا مقدمہ درج کروایا۔ تحقیقاتی کمیٹی نے ایف آئی آر پر اعتراض لگا دیا۔پنجاب اسمبلی کو بجلی فراہم کرنے کے لئے لاکھوں روپے کی خریدی ہوئی تار چوری ہو گئی۔ذرائع نے بتایا کہ میکلوڈروڈ گرڈ سٹیشن سے پنجاب اسمبلی کو انڈیپنڈنٹ فیڈر سے بجلی کا کنکشن فراہم کیا جانا ہے تاہم منصوبے پر کام شروع ہونے سے قبل ہی تار چوری کر لی گئی ہے۔ذرائع نے بتایا کہ پانچ سو ایم سی ایم کی چار سو پچاس میٹر تار چوری کر لی گئی ہے۔ افسروں ا ور ملازمین نے ملی بھگت سے ہزاروں روپے کا مقدمہ درج کروا یا ہے۔تار چوری کی واردات کی تحقیقات کے لئے تین رکنی کمیٹی تشکیل دے دی گئی ہے۔تحقیقاتی کمیٹی نے تار چوری پر ہونے والی ایف آئی آر پر تحفظات کا اظہار کرتے ہوئے کہا ہے کہ چوری ہونے والی کیبل کی لاگت زیادہ بنتی ہے تاہم کم لاگت کا مقدمہ درج کروایا گیا ہے۔کمیٹی میں ای ٹی راوی گرڈ سٹیشن رانا افتخار، حافظ شاہد اور ریذیڈنٹ انجینئر حافظ عثمان شامل ہیں۔

مزید : علاقائی