زرداری ٹولہ سیاست کے نام پر کلنک کا ٹیکہ ہے،عارف علوی

کراچی (اسٹاف رپورٹر)پاکستان تحریک انصاف سندھ کے صدر و رکن قومی اسمبلی ڈاکٹر عارف علوی نے کہا ہے کہ آصف زرداری ٹولہ سیاست کے نام پر کلنک کا ٹیکہ ہے۔ 05نومبر کو ضلع گھوٹکی اوباڑو میں ہونے والا جلسہ سندھ کی سیاست میں اہم سنگ میل ثابت ہوگا۔ سندھ سے کرپشن اور لوٹ مار کے خاتمے کے لئے تحریک انصاف کے قائد چیئرمین عمران خان سندھ کا بار بار دورہ کریں گے اور شہر تحصیل میں عوامی اجتماعات سے خطاب کریں گے۔ تحریک انصاف کی سیاست جدوجہد سے ہی موروثی اور روایتی سیاست کا خاتمہ ہوگا۔ سیاست کے نام پر لوٹ مار کرنے والوں کے دن ختم ہوچکے ہیں ۔ یہ باتیں انہوں نے پارٹی سیکریٹریٹ ’’انصاف ہاؤس ‘‘ کراچی میں ایک اہم اجلاس سے خطاب کرتے ہوئے کہیں۔ اجلاس میں کراچی ڈویژن کے صدر فردوس شمیم نقوی ،دیوان سچل، الیاس شیخ ، دوا خان صابر ، اظہر لغاری، طاہر ملک اور دیگر رہنماؤں نے بھی شرکت کی۔ ڈاکٹر عارف علو ی نے مزید کہا کہ سندھ حکومت اور انکے آقاؤں کا ایک ہی کام رہ گیا ہے اور وہ کام صرف سندھ کے عوام کے وسائل لوٹنا ہے۔ حکمرانوں کی کرپشن اور جان بوجھ کر گنے کی کرشنگ کا آغاز نہ کرنا آبادگاروں کے ساتھ زیادتی ہے۔ سارا سال محنت کر کے گنا اگاتے ہیں لیکن شوگر ملز مالکان جان بوجھ کر گنا وقت پر نہیں خریدتے اور آبادگاروں کو مناسب معاوضہ نہیں ملتا ۔ ڈاکٹر عارف علو ی نے مزید کہا کہ سندھ حکومت اپنے آقاؤں کو فائدہ پہنچانے کے بجائے ہوش کے ناخن لیں اور بلا تاخیر شوگر ملیں چلانے کا نوٹیفکیشن جاری کر کے گنے کی قیمت میں بھی مناسب اضافہ کریں تاکہ آبادگاروں اور کسانوں کو انکی محنت کا سلہ مل سکے ۔