حکومت نے رواں سال کوئی بھی کیس فوجی عدالتوں کو نہیں بھیجا،آرمی چیف نے وزیر اعظم کو خط لکھ دیا: نجی ٹی وی

اسلام آباد(ڈیلی پاکستان آن لائن) آرمی چیف جنرل قمر جاوید باجوہ نے وزیر اعظم پاکستان شاہد خاقان عباسی کو خط لکھا ہے ، جس میں ان کا کہنا تھا کہ کوئی شک نہیں کہ حکومت نیشنل ایکشن پلان پر سنجیدہ ہے تاہم کئی ماہ سے ایک بھی کیس فوجی عدالتوں کو نہیں بھجوایا گیا۔
نجی ٹی وی ایکسپریس نیوز کے مطابق آرمی چیف جنرل قمر جاوید باجوہ نے وزیراعظم شاہد خاقان عباسی کو خط لکھا جس میں انہوں نے دہشت گردوں کے کیس فوجی عدالتوں میں نہ بھجوائے جانے کی طرف توجہ دلاتے ہوئے کہا کہ حکومت کی جانب سے جنوری 2017 سے ایک بھی کیس فوجی عدالتوں میں نہیں بھیجا گیا۔آرمی چیف کا کہنا تھا کہ اس میں کوئی شک نہیں کہ حکومت نیشنل ایکشن پلان پر سنجیدہ ہے تاہم کئی ماہ سے ایک بھی کیس فوجی عدالتوں کو نہیں بھجوایا گیا۔
دوسری جانب آرمی چیف جنرل قمر جاوید باجوہ کے خط پر وزیر اعظم شاہد خاقان عباسی نے وزارت داخلہ سے رپورٹ طلب کرتے ہوئے اب تک فوجی عدالتوں کو بھجوائے گئے کیسوں کی رپورٹ پیش کرنے کا حکم دیا ہے۔وزیراعظم کے نوٹس کے بعد وزارت داخلہ نے 90 سے زائد کیسز فوجی عدالتوں میں بھیجنے کی سفارش تیار کرلی۔ واضح رہے دہشت گردی کے کیسز فوجی عدالتوں کو بھجوانے سے پہلے وفاقی حکومت کی منظوری ضروری ہے اور وزارت داخلہ کواس معاملے میں فوکل منسٹری بنا یا گیا تھا۔ٹی وی چینل کے مطابق جلد ہی یہ 90 کیس وفاقی کابینہ کے آئندہ اجلاس میں منظوری کے لیے پیش کیے جائیں گے۔