ایم ڈی کیٹ پیپرلیک کی تحقیقات ،96 طلبا ءسائبر کرائم میں پیش
کراچی (ڈیلی پاکستان آن لائن) میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) کا پرچہ لیک ہونے کی تحقیقات کے دوران 96 طلبا ایف آئی اے سائبر کرائم سرکل میں پیش ہوگئے۔
"جیونیوز"ے مطابق ایف آئی اے سائبر کرائم سرکل کی جانب سے ایم ڈی کیٹ کا پرچہ مبینہ طور پر لیک ہونے پر تفتیش کا سلسلہ جاری ہے جس میں ابتدائی طور پر 150 طلبا ءاور طالبات کو تفتیش کیلئے طلب کیا گیا تھا ۔
ذرائع ایف آئی اے کے مطابق گز شتہ روز طلب کیے گئے 96 طلبا ء ایف آئی اے کے دفتر میں تفتیش کیلئے پیش ہوئے جس دوران تمام طلبا ءکے والدین کی موجودگی میں بیانات قلمبند کیے گئے۔ طلب کیے جانے والے 150 طلبا ءنےایم ڈی کیٹ میں 200 میں سے 190 نمبر حاصل کیے تھے۔
ذرائع کے مطابق دوران تفتیش طلباء نے پرچہ یا گیس پیپر کے مبینہ طور پر لیک ہونے کی تفصیلات فراہم کی جب کہ بعض طلباء نے بتایا کہ واٹس ایپ کے ذریعے ایک روز قبل انہیں ملتاجلتا پرچہ موصول ہوا جب کہ طلباء کی جانب سے پرچہ بھیجنے والے افراد کے نمبرز بھی فراہم کیے جارہے ہیں۔
ایف آئی اے کا کہنا ہےکہ اب تک کی تفتیش میں 100 فیصد لیک پرچے کے حوالے سے معلومات نہیں ملیں، چند روز میں تمام طلباء کے بیانات سامنے آنے کے بعد مزید تفتیش کو آگے بڑھایاجائے گا۔
